Bashkimi Europian refuzon Serbinë

Vendimi i BE-së, i komunikuar të premten gjatë samitit të Brukselit, shprehu qartë se mungesa e dialogut me Kosovën është ajo që po kushtëzon të ardhmen europiane të vendit.

”Serbia ka bërë një progress të konsiderueshëm në përmbushjen e kriterit politik të Kopenhagenit dhe ka arritur një bashkëpunim plotësisht të kënaqshëm me Gjykatën Ndërkombëtare të Krimeve të Luftës, në lidhje me personat e kërkuar që fshihen në Serbi. Megjithatë, Brukseli sheh me shqetësim refuzimin e përsëritur për t’u përfshirë në dialog me Kosovën, pavarësisht garancive dhe ndërmjetësimit të Bashkimit Europian”, shkruhej në raportin që iu paraqit Serbisë, të cituar nga “Radio Europa e Lirë”.

Në dokument, gjithashtu flitej për nevojën e përkushtimit në biseda me EULEX-in, misionin ushtarak të KFOR-it dhe për “angazhimin më të madh të autoriteteve serbe në largimin e barrikadave në rrugë nga pjesa veriore e Kosovës”.

Shansi i radhës për të fituar statusin e vendit kandidat për Beogradin do të jetë në mars 2012. Raporti i plotë mbi progresin e vendit do t’i dorëzohet autoriteve serbe më vonë gjatë ditës.

Siç raporton e përditshmja më e madhe serbe, “B-92”, çështja e kandidaturës serbe ka krijuar ndarje brenda vetë Bashkimit Europian. Nga ana e saj, Franca këmbënguli për t’i akorduar menjëherë Beogradit statusin, duke arsyetuar se “Serbia ka bërë atë që kishte në dorë të bënte për të fituar besimin e BE-së, me firmosjen e marrëveshjes për manaxhimin e integruar të kufijve me Kosovën”.

Megjithatë, një hap i tillë nuk u konsiderua i mjaftueshëm nga fuqi të tjera të mëdha brenda BE-së, si Gjermania. Austria, Danimarka, Finlanda, Holanda dhe Britania e Madhe besohet se mbështetën të gjitha qëndrimin e Berlinit.

Një ditë më parë, Presidenti i Serbisë, Boris Tadiç, paralajmëroi Europën për fuqizimin e lëvizjeve nacionaliste në vend, në rast të refuzimit të statusit. Nga ana e tij, Zëvendëskryeministri Daçiç komentoi me cinizëm se “Serbia do të vazhdojë të ekzistojë edhe të nesërmen e vendimit, pavarësisht se cili do të jetë ai”.

Top Channel