PDIU “rebelohet” ndaj Haxhinastos

06/04/2012 00:00

Një deklaratë i ministrit të Punëve të Jashtme Edmond Haxhinasto se, termi “Çamëri” nuk ekziston, ka provokuar një reagim therrës nga ana e Partisë për Drejtësi, Integrim dhe Unitet, që mbron interesat e komunitetit çam.

Ministri Haxhinasto, që është edhe zëvendëskryetar i LSI-së, e bëri këtë deklaratë gjatë një interviste për emisionin “Debat” të Alfred Pezës.

Në reagimin e shpërndarë me e-mail, PDIU ndalet në një shpjegim të hollësishëm të toponimisë, duke sqaruar se termi “Çamëri” vjen nga lumi që në antikitet quhej Thiamis. Po ashtu, termi “Çamëri”, sqaron PDIU, ka qenë term zyrtar i shtetit grek deri në vitet ’40.

“Termi “Çamëri” është zëvendësuar pjesërisht me termin “Thesproti” vetëm si term i një nëndarjeje administrative dhe jo si toponim gjeografik”, thotë PDIU në deklaratën e vet.

Duke përmendur rastet e shqiptarëve që janë ndaluar të hyjnë në Greqi për shkak të vendlindjes së tyre të shkruar në pasaportë, PDIU sqaron se në pasaportat e tyre është shkruar vetëm qyteti apo fshati i lindjes, si Paramithi, Gumenicë, Pargë, Margëlliç, Filat, etj.

Në lidhje me këto raste, thotë PDIU, shteti shqiptar në vend që të qëndrojë apatik, duhet të kërkojë dhe të shohë se si e kanë zgjidhur Maqedonia dhe Turqia këtë çështje me Greqinë dhe se si lejohet që shtetasit grekë të kenë në dokumentat e tyre vendlindje si Smirni dhe Konstandinupoli dhe jo Izmir apo Instambul, që janë toponimet zyrtare.

Është e papranueshme, thotë PDIU në deklaratën e saj, që ministri shqiptar i Punëve të Jashtme, që duhet të protestonte dhe të hidhte poshtë me argumente historike dhe të së drejtës ndërkombëtare këtë pretendim absurd të palës greke, i bën tezat e Greqisë të vetat.

“Shteti shqiptar duhet të kundërshtojë këtë qëndrim absurd. Në të kundërt, partia jonë do të përvijojë edhe e vetme betejën institucionale për të drejtat e mohuara”, e mbyll deklaratën e saj PDIU.

PDIU u bë pjesë e koalicionit qeveritar në nivel zv/ministrash vetëm pak kohë më parë. Kjo parti ka dy deputetë në Kuvend, votat e së cilës janë po aq të vyera në këto momente sa edhe katër votat e LSI-së.

Top Channel