Rusi, miratohet ligji anti-protestë

Në bazë të ligjit të ri, pjesëmarrja në manifestime për të cilën nuk është lëshuar një leje nga policia, nga ndëshkimi prej 5 mijë rublash (152 dollarësh) në fuqi, tashmë do të gjobitet me 300 mijë rubla për pjesëmarrësit (9 100 $) dhe deri 600 mijë rubla (18 200 $) për organizatorë.

Projektligji u mbështet nga 132 senatorë ditën e martë, me vetëm njërin që votoi kundër dhe një të dytë që abstenoi.

Në mënyrë që të shndërrohet në ligj, projekti duhet të marrë firmën e presidentit Putin, diçka që pritet të jetë vetëm një formalitet, pasi ishte vetë partia e komanduar prej tij, “Rusia e Bashkuar”, ajo që propozoi ligjin.

Rusia u trondit nga tre muaj protesta të fuqishme pas parregullsive që u regjistruan në zgjedhjet parlamentare të shkurtit dhe ato presidenciale në prill.

Disa organizata ndërkombëtare dhe aktivistë pro-demokracisë në Rusi kundërshtuan ashpër ligjin e ri, të konsideruar si tejet shtypës dhe frikësues për të gjithë ata që marrin pjesë në manifestime anti-qeritare.

Gennady Gudkov, një deputet i partisë opozitare “Rusia e Drejtë”, e përshkroi ligjin si “drakonian”, ndërsa theksoi se ai reflekton frikën e Kremlinit nga njerëzit e tij.

”Ky ligj shtron rrugën për një luftë civile, për repression masiv në të ardhmen dhe të gjithë e dimë se si përfundon shtypja, në gjakderdhje, varfëri dhe revolucion”, u shpreh Gudkov.

Edhe ish-presidenti rus, Mikhail Gorbaciov shprehu besimin e tij se presidenti Vladimir Putin nuk do të dekretojë ligjin e ri që rrit në mënyrë drastike gjobat për të gjithë pjesëmarrësit dhe organizatorët në manifestimet e paautorizuara.

I cituar nga agjencia e lajmeve Interfax, ish-presidenti rus, i nderuar me cmimin Nobel për Paqe, tha se “Putin nuk do të firmosë ligjin, pasi sipas tij, projekti është jë tirani”.

Top Channel