Imuniteti, Berisha shpall referendumin

“Nesër do t’i drejtohemi popullit për një referendum qytetar për heqjen e imunitetit. Do të jetë një votim plebishitar për shembjen e murit të turpit”, ka deklaruar Berisha.

Më herët gjatë fjalës së tij, kryeministri akuzoi deputetët e opozitës se me veprimin e tyre për të mos e votuar heqjen e imunitetit, po shkelnin interesat parësore të votuesve të tyre.

“Sot më shumë se kurrë, ligjvënësit duhet të tregonin më shumë respekt për qytetarët, institucionet dhe të ardhmen evropiane të vendit. Por deputetët e opozitës ngritën murin e bllokimit dhe u përcaktuan në mënyrë unanime se do bllokojnë votimin për heqjen e imunitetit. Deputetët e opozitës do ngrihen në kundërshtim flagrant me interesat e zgjedhësve të tyre”, deklaroi Berisha.

Kryeministri u shpreh se synimi i vetëm i opozitës është bllokimi i statusit të kandidatit, sikurse është përpjekur të bëjë me nënshkrimin e MSA-së dhe anëtarësimin e vendit në NATO.

“Kështu bëtë edhe për të bllokuar MSA-në dhe anëtarësimin në NATO. Është skemë tipike e PPSH-së. Kryetari juaj besonte se do ishte kryeministri i ardhshëm dhe pa imunitet, ai s’e konceptonte dot veten”, tha Berisha.

“Edhe ligjin për pasuritë kriminale, që na u kërkua për heqjen e vizave, jo vetëm që e votuat kundër, por e çuat në Gjykatën Kushtetuese. Opozita, në emër të trafikantëve, e çoi atë në Gjykatën Kushtetuese”, vijoi më tej kreu i qeverisë.

Majko: Heqja e imunitetit, iluzion i Berishës

Ndërsa para fjalës së kryeministrit, ishte deputeti socialist Pandeli Majko që deklaroi se nisma e mazhorancës për heqjen e imunitetit është vetëm një iluzion.

Ai theksoi se problemi nuk qëndron tek imuniteti që Kushtetuta u jep zyrtarëve, por tek imuniteti politik që atyre u jep posti qeveritar.

“Qeveria dëshiron të ushqejë iluzionin se me këtë votim i jep fund korrupsionit në Shqipëri. Në fillim duhet hequr imuniteti politik, është ky imunitet dhe jo ai kushtetues që mbron zyrtarët nga korrupsioni. Kjo është ortakëria e së keqes. Drejtësia që nuk godet korruptohet, ky është realiteti”, nënvizoi Majko.

“Duket sikur kemi një qeveri që po tenton të bindë qytetarët dhe Brukselin se po bën maksimumin për të luftuar korrupsionin”, u shpreh më tej ai.

Majko vlerësoi se, PS u bë protagoniste e një kompromisi për ndryshimet kushtetuese, por kjo nuk ndihmoi në zgjidhjen e problemeve.

“Faji i opozitës ishte se propozoi ndryshime të tjera që konsistonin në mënyrën e zgjedhjes së krerëve të institucioneve kushtetuese. Dështimi vjen si pasojë e pafuqisë së qeverisë, që dështoi në implementimin e premtimit të vitit 2005, për luftimin e korrupsionit dhe forcimin e shtetit ligjor”, tha më tej Majko.

Edhe deputeti Taulant Balla theksoi se problemi nuk qëndron tek Partia Socialiste dhe tek “klubi i miliarderëve” të saj, por tek ata që ai i quajti miliarderët e qeverisë dhe të familjes së kryeministrit.

“Si janë bërë këta miliarderë? Me tre shtëpi në Tiranë, një në Gjirin e Lalëzit. Krahaso, Sali, bilancin e djalit tënd me bilancin e Tom Doshit. 200 mijë euro siguron Shkëlzeni”, tha Balla.

Debatet maratonë në Kuvend

Opozita njoftoi se nuk do te votonte, megjithese nuk është kundër kufizimit
të imunitetit, duke kërkuar që në shtator të votohen edhe ndryshime te
tjera.

Fatmir Xhafaj: Nuk e votuam projektin në tërësi në pritje të përfundimit të procesit, që do të prodhojë një tekst të integruar përndryshimet kushtetutese, për t’u miratuar më pas në Kuvend. Eshtë e papranueshme që të votojmë dy herë për ndryshimin e Kushtetutës, një herë në gusht dhe një herë në shtator. Ky do të ishte një rast i paprecedentë, që do ta bënte Kuvendin e Shqipërisë e të gjithëve ne, qesharakë. Ky është qëndrimi ynë, askush nuk mund të provojë të kundërtën dhe për më tepër askush nuk ka të drejtë të shpife dhe spekulojë mbi këtë qëndrim të qartë, publik, politik, institucional dhe parlamentar. Ju po mundoheni të bindni shqiptarët se po nuk u votua për këtë çështje nuk na e japin statusin dhe fajin e ka opozita. Alibi e bukur politike, por kam një pyetje në invers, po nëse amendamentet për imunitetin miratohen brenda muajit shtator, siç edhe kërkohet nga komisioneri dhe ne ‘larg qoftë’ nuk na e japin statusin e vendit kandidat, e kujt është përgjegjësia? Jeni ju të gatshëm ta pranoni këtë përgjegjësi publike dhe të dorëhiqeni nga posti juaj?

Sali Berisha: Ju bllokoni për të bllokuar statusin për të tretën herë dhe përcaktoni si kusht atë pushtet që shqiptarët s’ua japin. Përcaktoni si kusht, që ne të pranojmë që ju të bllokoni shtetin ose të kapni krerët e institucioneve kushtetuese. Çfarë kërkoni ju? Ju kërkoni Kushtetutën e sundimit të pakicës. E keni këtë nga mendësia e etërve tuaj apo e keni këtë nga pesimizmi absolut, pasi jeni në një tunel pa drite dhe fitore nuk shihni, kjo është puna juaj. Per arsye se kryetari juaj ju con nga disfata në disfatë, Sali Berisha nuk mund të bëhet lideri juaj. Pra, çdo gjë mund t’i bëj unë atij, por lider nuk mund ta bëj unë atë.

Fatmir Xhafaj: Nëse ju këmbëngulni në variantin tuaj, në ultimatumin tuaj, kjo do të ishte një goditje e rëndë e nevojës për konsensus. Do të ishte një zhgënjim për Brukselin që përmes komisionerit Fyle ju ka bërë thirrje të tregoni rezultate konkrete, të fokusuar në reforma dhe ngulmimin për të treguar sinqeritet dhe aftësi për kompromis me qëllimin për të arritur paraqitjet dhe rezultatet e nevojshme në shtator. Në të kundërt qëllimi mbetet thjesht politik dhe paraelektoral. Kjo tregon qw  mbi respektin për Kushtetutën, rëndësi ka axhenda e interesave personale, politike dhe elektorale. Kjo nuk është rruga që siguron konsensusi. Kjo është logjikë përjashtuese, logjika që na ndan, muri që i vihet procesit të bashkëpunimit dhe konsensusit.

Sali Berisha: Ne bëmë kompromisin me ju, ne u tërhoqëm nga varianti ynë, ne u tërhoqëm nga varianti ndërkombëtar, ne pranuam variantin tuaj. Doni të bllokoni? Bllokoni!Për mua nuk votoni, por kur të vijë puna në rrafshin elektoral, absolutisht ata që do të paguajnë faturën më të madhe janë ata që bllokojnë.

Top Channel