40 vjet Akadademia e Shkencave

Kryetari i Akademisë së Shkencave të Shqipërisë, zoti Gudar Beqiraj, ka evidentuar në fjalën e tij kontributin e institucionit që ai drejton dhe ka vlerësuar disa prej figurave më të rëndësishme që kanë dhënë ndihmesën e tyre ndër vite, në drejtim të dijes.

“Studimet shkencore të kryera nga institutet e Akademisë së Shkencave kanë zgjidhur një varg problemesh themelore të lidhura me njohjen e historisë, gjuhës e kulturës së popullit shqiptar. Ndër shekuj nuk kanë munguar përpjekjet e shqiptarëve për të lëvruar dijet e tyre. Shumë figura të ndritura të kombit shqiptar, si Sami Frashëri, Hasan Tahsini, Fan Noli, megjithëse e zhvillonin veprimtarinë e tyre jashtë atdheut, u përpoqën jo vetëm për liri e pavarësi, por edhe për zhvillimin e arsimit, kulturës e të shkencës shqiptare”, ka deklaruar Beqiraj.

I pranishëm ka qenë edhe kryeministri Sali Berisha, i cili është vlerësuar nga Akademia Europiane e Shkencave dhe Artit me titullin “Senator Honoris Causa”, për angazhimin e tij në nxitjen e zhvillimit të shkencave në Shqipëri.

“Sot është një rast i veçantë për mua të përshëndes dhe të shpreh nderimin tim më të madh ndaj atyre burrave dhe grave që themeluan Akademinë e Shkencave 40 vjet më parë. Ata ishin kollosë të mendimit intelektual shqiptar, të mendimit akademik shqiptar, në vazhdën e mendimit të rilindësve shqiptarë”, ka deklaruar Berisha.

Me reformën e kryer tre vjet më parë, Akademia e Shkencave ka mbetur tashmë një institucion thjeshte honorifik, pasi të gjitha institutet kërkimore shkencore u hoqën nga varësia e saj, duke iu kaluar universiteteve dhe fakulteteve sipas fushës. Por me këtë trasnferim, puna kërkimore në pjesën më të madhe të tyre thuajse ka pushuar.

Top Channel