Dhuna ndaj shqiptarëve, reagime në Maqedoni

Huliganët maqedonas kanë fyer shqiptarët dhe kanë djegur flamurin kombëtar, ndërsa pas ndeshjes kanë rrahur pa asnjë faj dy persona të moshuar dhe një vajzë 15-vjeçare, të tre me kombësi shqiptare. Partia e Ali Ahmetit, BDI, që është pjesë e pushtetit, ka bërë thirrje që autorët e incidenteve të marrin dënimin e merituar.

“Jemi thellësisht të brengosur për nivelin e urretjes, e cila duket se rrezikon të shndërrohet në sjellje të rregullt të tifozerisë etnike maqedonase. Kërkojmë dhe apelojmë tek organet e rendit, që t’i identifikojnë autorët e këtyre ngjarjeve dhe t’i sjellin ata para organeve të rendit, duke mos u nisur nga asnjë lloj qasje selektive”, tha Emira Mehmeti, deputete e BDI-së.

Nga ana tjetër, opozita shqiptare në Maqedoni tha se partia e Ali Ahmetit mban pjesën më të madhe të fajit për dhunën e vazhdueshme, që po ushtrohet ndaj shqiptarëve në Maqedoni.

“Politika nënshtruese e BDI-së dhe Ali Ahmetit, u mundëson maqedonasve të ushtrojnë dhunë ndaj shqiptarëve. Dje, ashtu si pardje, sikurse para një viti dhe para një muaji, shqiptarët keqtrajtohen, u montohen proçese gjyqësore, u rrënohen shtëpitë, shqiptarëve i digjet flamuri. Gjithë kjo e keqe, që u ndodh shqiptarëve, e ka vetëm një emër: BDI dhe Ali Ahmeti”, tha Orhan Ibrahimi, deputet i PDSH-së.

Tre personat e rrahur nga huliganët maqedonas nuk kanë pranuar të flasin para kamerave, për shkak se janë të frikësuar për sigurinë e tyre. Gjendja shëndetësore e tyre është e qëndrueshme, edhe pse në trup u vërehen shenja nga dhuna. Ditëve të fundit janë shtuar incidentet ndëretnike në Maqedoni, ndërsa raportohet për disa shqiptarë të rrahur.

Top Channel