Tiranë, banorët e Laprakës në protestë

13/12/2012 00:00

Mungesa e energjisë elektrike nxorri në protestë banorët e Laprakës në Tiranë, të cilët prej dy ditësh janë në errësirë të plotë.

Banorët bllokuan rrugën në mbrëmje, ndërsa i vunë edhe flakën kazanëve të plehrave në shenjë proteste. Situata u bë kaotike pasi qindra automjete u bllokuan në trafik, ndërsa policia ndërhyri për të liruar rrugën.

Nga dita e djeshme mijëra banorë në Tiranë kanë mbetur pa energji elektrike për shkak se një kompani ndërtimi e kontraktuar nga bashkia e Tiranës për sistemimin e kanalizimeve ka prerë kabllot elektrikë në Laprakë.

Pa energji elektrike kanë mbetur edhe banorët në rrugën Babë Rexha, pallatët e Izraelit pranë fushës së aviacionit, zona pranë ish-shkollës së partisë, etj.

Kompania CEZ Shpërndarje njofton se këto zona do të vazhdojnë të mbeten pa energji elktrike për shkak se defekti është i rëndë.

Ndërkohë, në vendin ku është dëmtuar kablli thonë se ende nuk gjendet një pjesë e tij. Banorët akuzojnë punonjësit e CEZ se u kanë kërkuar banorëve të blejnë kabëll e më pas të nisin riparimin.

Nuk është hera e parë që banorët mbeten pa energji elektrike apo pa ujë të pijshëm pasi firmat e ndërtimit kur punojnë nuk kanë në dispozicion hartën me shtrirjen e kabllove elektrike, telefonike, apo të tubacioneve të ujit.

Top Channel