Serbia në ankth, Rusia: Jo ultimatume

Serbia ndodhet në gjendje tensioni të thellë për të dhënë përgjigje në Bruksel nëse pranon ose jo nënshkrimin e marrëveshjes për zgjidhjen e problemit të veriut, kusht që e çon apo jo drejt fillimit të negociatave për integrim në Bashkimin Evropian.

Fillimisht, për orë të tëra, Vuçiç dhe presidenti Tomisllav Nikoliç, e më pas edhe kryeministri Daçiç kanë diskutuar për zgjidhjen, por në fund nuk kanë pasur përgjigje për median.

Këshilltari i Nikoliç, Marko Gjuriç ka thënë se do të vlerësohen humbjet për pranimin ose refuzimin e marrëveshjes. Por, në të dyja rastet Serbia do të humbë.

Pas takimit ka pasuar mbledhja e qeverisë ku Daçiç i ka njoftuar ministrat për gjendjen e rëndë. Partitë liberale opozitare kanë shprehur mbështetje për nënshkrimin e marrëveshjes si rrugë të vetme.

Ndërsa demokratët kanë thënë se është e papranueshme që vetëm zyrtarët e shtetit kanë njohuri për atë që është duke ndodhur. Kurse partia qeveritare Rajonet e Bashkuara të Serbisë mbështet nënshkrimin si ofertën më të mirë.

Lavrov: Jo ultimatume Serbisë

Ministri i Jashtëm i Rusisë, Sergey Lavrov, duke folur për bisedimet Kosovë-Serbi ka thënë se ultimatumet janë të papranueshme.

“Ultimatumet për çështjen e Kosovës janë të papranueshme dhe Rusia mbështet politikën që udhëheqja e Serbisë po zhvillon për Kosovën”, ka deklaruar Lavrov.

Në këtë mënyrë Lavrov ka komentuar qasjen e BE-së, e cila ka kërkuar nga Serbia që të pranojë marrëveshjen në formën “merre ose lëre”.

Në një konferencë me gazetarë, ministri ka deklaruar se pozicioni i Serbisë korrespondon me parimet kryesore të Aktit Final të Helsinkit, që nënkupton se, zgjidhja e të gjitha problemeve duhet të arrihet me marrëveshje reciproke.

Sipas agjencisë së lajmeve “Itar-Tass”, Lavrov ka rikujtuar se, kur BE nisi ndërmjetësimin e takimeve Beograd-Prishtinë, me qëllim arritjen e çfarëdo vendimi të pranueshëm reciprocikisht, Rusia e kishte përshëndetur pozicionin e saj.

“Ne e kemi mbështetur rezolutën përkatëse të Asamblesë së Përgjithshme, që miratoi përpjekjet për ndërmjetësim”, ka thënë shefi i diplomacisë ruse.

“As rezoluta e Asamblesë së Përgjithshme, që i përcakton parametrat e bisedimeve, e asnjë dokument tjetër nuk paraqesin ndonjë provë se ultimatumet janë të pranueshme”, ka vijuar ai. 

Top Channel