Kroaci, babai vret të bijën nga dhembshuria

23-vjeçarja, Marianne Greguriç, pas një aksidenti kishte përfunduar në koma, në një gjendje vegjetative.

Ajo jetonte në kushte spitalore, pa mundësi rikuperimi, pasi pas aksidentit kishte kaluar disa minuta pa oksigjen në tru, e si rrjedhojë kishte humbur përfundimisht funksionet konjitive dhe shumicën e funksioneve të tjera mendore.

Megjithatë, për shkak të ligjit kroat, i njëjtë me atë shqiptar dhe të shumicës së vendeve europiane, që e konsideron të jashtëligjshme vetvrasjen e asistuar, njohur gjerësisht si eutanazi, e reja mbahej në jetë falë pajisjeve mjekësore.

Duke dashur t’i jepte fund vuajtjeve të së bijës dhe gjendjes së saj të pashpresë, babai 57-vjeçar, Josu Greguriç vendosi të ndërhynte, duke injektuar në serum një tretësirë fatale mbidoze barnash.

Babai vrasës, pas arrestimit në tetor 2012, ngjalli një simpati kombëtare, për shkak të historisë së tij të dhimbshme.

Në gjykatën e qytetit të Sisakut, ku ndodhi fatkeqësia, gjykatësja e çështjes argumentoi se “ndonëse vrasja për mëshirë nuk njihet në terma ligjorë, rrethanat lehtësuese ekzistojnë dhe dëmi që i është bërë shoqërisë është minimal”.

Ky vlerësim merr parasysh këndvështrimin se 23-vjeçarja ishte tashmë e vdekur, duke e gjykuar në prizmin e pamundësisë së rikuperimit të saj.

Për këtë arsye, gjykata dënoi 57-vjeçarin me minimumin e mundshëm të njohur nga ligji për këtë vepër penale, me dy vite burgim.

Greguriç kishte lënë veten në dorë të mëshirës së drejtësisë më parë, duke pranuar krimin dhe mos nxjerrë asnjë pretendim për mënyrën apo kohëzgjatjen e dënimit të tij.

Top Channel