“Një komb, një kulturë”

Për ta bërë përurimin e kësaj ekspozite, në Prishtinë erdhi, në një vizitë zyrtare, ministri shqiptar i Kulturës, Visar Zhiti.

Pas një takimi me ministrin e Kulturës së Kosovës, Memli Krasniqi, ai tha se këto objekte arkeologjike vërtetojnë më së miri të ardhmen e përbashkët drejt Europës.

“Është një ditë me të vërtetë e shumëpritur dhe e ëndërruar nga të gjithë ne, nisja e negociatave për MSA-në me zotin Fule. Këto janë hapa të mrekullueshme, që Kosova e shqiptarët si komb, bëjnë drejt Europës. Por kjo, gjithsesi, në çdo hap shoqërohet edhe me kulturën. Ne – edhe në bisedën e përbashkët – thamë se nuk jemi për të përgjysmuar kulturën, por duke qenë një kulturë me dy ministra, dy Ministri e dy qeveri, është si të thuash se do të dyfishojmë energjitë tona për të arritur tek ëndrrat, te dëshirat, tek e ardhmja. Projektet e realizimet do të jenë të përbashkëta”, u shpreh Visar Zhiti, ministër i Turizmit, Kulturës, Rinisë e Sporteve, Shqipëri.

Ministri kosovar i Kulturës, duke iu referuar edhe emrit të ekspozitës “Një komb, një kulturë”, tha se institucionet e të dyja vendeve janë të detyruara të thellojnë bashkëpunimin në fushat e kulturës, trashëgimisë, sportit dhe rinisë.

“Ne duke qenë një komb, pa dyshim që në çështjet e kulturës dhe trashëgimisë kulturore, kemi pika të përbashkëta por edhe më shumë, ndaj dhe e kemi obligim institucional dhe karshi qytetarëve tanë, që të investojmë edhe më shumë në avancimin dhe thellimin e këtij bashkëpunimi, e veçanërisht në mbështetjen e institucioneve tona kulturore, që funksionojnë në varësi të dy Ministrive përkatëse, por edhe në mbështetjen e artistëve tanë, e veçarërisht gjeneratave të reja”, tha Memli Krasniqi, ministër i Kulturës, Rinisë dhe Sportit, Kosovë.

Një ekspozitë, me objekte të trashëgimisë arkeologjike dhe titull “Një komb, një kulturë”, u hap këtë të enjte në Muzeun e Kosovës, e cila do të qëndrojë e hapur deri më 30 tetor.

Top Channel