Shtëpia e Oficerëve, seli e PD

Të paktën sot, me letra, e ka. Sepse në mbledhjen e së mërkurës, qeveria, e cila është në fund të mandatit të saj, ka marrë vendim t’i kalojë Partisë Demokratike një nga pronat më të lakmueshme të Ministrisë së Mbrojtjes. Bëhet fjalë për Shtëpinë Qëndrore të Ushtrisë, përbri Parlamentit.

Vendimi në fjalë nuk gjendet i publikuar në faqen zyrtare të Këshillit të Ministrave së bashku me vendimet e tjera, por burime zyrtare konfirmojnë për Top Channel se qeveria e kryeministrit Berisha e ka miratuar atë.

Nuk dihet me saktësi se çfarë do të bëhet me godinën historike të Partisë Demokratike, e cila nuk është në pronësi të kësaj force politike dhe gjendet në një territor që ka pronarë privatë.

Ajo që dihet është se ka qenë kreu i ri i demokratëve, Lulzim Basha, njëkohësisht kryetar i Bashkisë së Tiranës, ai që ka bërë propozimin për marrjen e një godine tjetër për Partinë Demokratike dhe për këtë është piketuar Shtëpia Qëndrore e Ushtrisë, e cila ka një territor dhe një ndërtim shumë më të madh sesa selia aktuale e Partisë Demokratike.

Është shumë herët të flitet se çfarë qëndrimi do të mbajë kryeministri i ardhshëm, Edi Rama, rreth këtij vendimi, që transferon një pronë publike nga Ministria e Mbrojtjes tek forca kryesore e opozitës së ardhshme.

Por, deri tani Partia Socialiste ka mbajtur një qëndrim të ashpër për futjen në proces privatizimi të disa pronave të tjera të Ministrisë së Mbrojtjes, duke deklaruar se do të kthejë mbrapsht çdo vendim që mazhoranca e re konsideron se ka cënuar interesin publik.

Braçe: Berisha grabit pronat publike
Kjo dëshmon përdorimin e Ushtrisë e burimeve të saj për qëllime politike

Pas publikimit nga Top Channel, të lajmit për kalimin e Shtëpisë Qendrore të Ushtrisë në seli të Partisë Demokratike, reagoi deputeti socialist Erion Braçe.

“Sali Berisha grabit një super pronë në mes të Tiranës”, ky është titulli i komentit të Braçes, mbrëmjen e së enjtes në Facebook.

“Kjo është prona e fundit e Ushtrisë, e grabitur nën “qeverisjen” e Arben Imamit. Me këtë akt, të propozuar nga Lulzim Basha, Imami po blen postin e Sekretarit të Përgjithshëm në PD; Berisha e Basha tani e kanë zërin e tyre”, shkruan Braçe.

“Ky akt – thotë ai, – jo vetëm dëshmon për përdorimin e vijueshëm të Ushtrisë, burimeve të saj, për qëllime politike – dhe ky është një shpërdorim ekstrem i detyrës, – por ky akt dëshmon edhe se si grabitet një pronë publike, pronë e qytetarëve të këtij vendi, për një seli partie, selinë e Partisë Demokratike”.

Deputeti Braçe i dërgon një apel Prokurorisë së Përgjithshme, kur thotë: “Arben Imami është përgjegjësi dhe ndaj tij duhet hetim penal menjëherë”.

“Unë dyshoj se si ky vendim, i pa bërë publik nga mbledhja e djeshme e qeverisë, është edhe një tjetër për pasurinë më të madhe kombëtare të shqiptarëve, naftën”, thotë Braçe në fund të komentit.

Top Channel