KE për Maqedoninë

Komisioneri për Zgjerimin, Shtefan Fyle, gjatë shpalosjes së raportit të progresit porositi Shkupin që të krijojë kushtet që vendet anëtare ta shqyrtojnë seriozisht rekomandimin për nisjen e negociatave.

Fyle po ashtu ftoi zyrtarët maqedonas të llogarisin çmimin e kompromisit për çështjen e emrit, por edhe çmimin e ngecjes në procesin eurointegrues. Ai tha se moszgjidhja e problemit bilateral me Greqinë bart me vete pasoja dhe ka kosto për vendin dhe qytetarët.

Menjëherë pas publikimit të raportit të progresit, edhe ambasdori i BE-së në Shkup, Aivo Orav e vuri thekstin tek zgjidhja e shpejtë e çështjes së emrit dhe marrëdhëniet konstruktive me fqinjët.

“Edhe për të pestën herë me radhë u rekomandua që të nisni negociatat dhe Komisioni Evropian përsëriti qëndrimin e tij se fillimi i tyre do të krijojë kushte të përshtatshme për të përmirësuar marrëdhëniet ndërfqinjësore dhe me këtë rast edhe të zgjidhë çështjen e emrit. Rekomandimi është i qartë dhe ky është një lajm i mirë për vendin”, deklaroi Orav.

Në raportin e progresit, Komisioni Evropian edhe këtë vit theksoi nevojën e pavarësisë së gjyqësorit, reformat zgjedhore, luftën kundër krimit, si dhe zbatimin e plotë të Marrëveshjes së Ohrit. Sa i përket lirisë se medias, qeverisë së Shkupit i është kërkuar që të ritkhejë dialogun me Shoqatën e Gazetarëve.

Top Channel