Korrupsioni në drejtësi

Edhe pse të korruptuarit nuk përfaqësojnë gjithë sistemin, sipas diplomatit amerikan disa gjykatës sot duhet të ishin në burg.

“Cila ka qenë sfida më e madhe e gjyqësorit? Ndoshta korrupsioni në polici, kështu do përgjigjesha. Përsëri besova se disa do të spikasnin për jo efikasitetin, por sërish nuk ishte kjo gjë nga ana e prokurorëve. Përgjigja më e madhe që unë mora ishte, gjyqësori dhe gjykatësit. Dhe e them se ky sondazh mund të mos jetë shkencor, por pasqyron atë mendim që kanë shumica e publikut në Shqipëri. Pastaj mendova se kjo nuk është e drejtë kundrejt gjykatësve dhe ne të gjithë e dimë që ka disa gjyqtarë të korruptuar që duhet të ishin në burg, të gjithë e dinë këtë. Por pjesa më e madhe e gjykatësve nuk bien në këtë kategori, sepse nuk është thjesht një problem i gjykatësve, por problem i shoqërisë dhe shtetit ligjor”, tha ambasadori Aleksander Arvizu.

Ne simpoziumin e organizuar nga Ambasada Amerikane per politikat që duhen ndjekur ne gjyqesor, merrte pjese edhe Presidenti i Republikes Bujar Nishani, i cili pranoi faktin se ne gjyqesor ka te korruptuar, por shtoi se duhen promovuar te perkushtuarit. Per Presidentin, kjo eshte sfida e se ardhmes.

“Sfida midis perceptimit dhe realitetit. Për fat të keq, ne shqiptarët e kemi këtë sfidë të madhe me tërë problematikën dhe me tërë mënyrën e funksionimit të shoqërisë sonë. A është sistemi gjyqësor dhe në tërësi sistemi i drejtësisë në Shqipëri i korruptuar? Personalisht nuk do të merrja kurajon të thoja ‘po’. A kemi ne gjyqtarë dhe prokurorë të korruptuar në sistemin tonë të drejtësisë? Do të thoja me zë të lartë ‘po’. Por a kemi ne gjyqtarë dhe prokurorë kurajozë, të dashuruar dhe të lidhur me profesionin? Do të thoja me zë të lartë ‘po'”, tha Nishani.

Mosndëshkimi i korrupsionit brenda vetë sistemit të drejtësisë ka qenë një kritikë e vazhdueshme për sistemin dhe vetë institucionin, që merret me kontrollin dhe emërimet e gjyqtarëve, siç është Këshilli i Lartë i Drejtësisë.

Top Channel