Pr/buxheti i Greqisë për 2014-ën

“Ky është një buxhet që provon se përpjekjet fiskale të bëra nga populli grek kanë sjellë frytet e duhura në mënyrë të konsiderueshme”, tha Janis Sturnaras, Ministri i Financave.

Megjithë lajmin e mirë përfaqësuesit e kreditorëve janë larguar nga Athina duke  përfunduar një tjetër cikël negociatash pa marrëveshje të plotë, kryesisht për cështjen e boshllëkut fiskal për vitet 2014-2015 dhe duke lënë ende pezull aprovimin për këstin e fundit në qershorin e vitit të ardhshëm nga paketa kolosale e ndihmës ekonomike që Greqia merr prej vitit 2010.

“Dihet tashme se në tre vitet e fundit ekonomia greke ka kaluar përmes një testi historikisht te dhimbshëm, me recesion të thellë dhe papunësi të paparë. Qytetarët kanë bërë dhe bëjnë sakrifica të jashtëzakonshme si në aspektin e reformave fiskale ashtu dhe në aspektin e standardeve të jetesës”, tha Kristos Staikouras, nga Ministria greke e Financave.

Por megjithë sakrificat, sipas kreut të Eurogrupit, Jeroen Dijsselbloem ministrat e Eurozonës po e humbasin durimin me qeverinë greke, pasi sipas tyre ende ka shumë punë për t’u bërë. Edhe “Financial Times” në artikullin e fundit cilëson si kokëfortësi  kundërshtimin e grekëve për masa të reja dhe paralajmëron Athinën se megjithë euforinë e saj për arritjen e numrit rekord të turistëve të huaj dhe sufiçitin primar, ende nuk është larguar prej saj rreziku i largimit nga Eurozona.

Nga ana tjetër edhe zëdhënësi i Komisionerit Europian për Ekonominë, Olli Rehn ka deklaruar nga Brukseli se disa prej elementeve të projekt-buxhetit të paraqitur nuk mund të jenë në fuqi pa dhënë miratimin përfaqësuesit e BE,FMN dhe BQE. Me interes për zhvillimet në vazhdim pritet takimi i së premtes në Berlin midis kancelares gjermane, Angela Merkel dhe kryeministrit grek, Andonis Samaras.

Top Channel