“Jon”, shitja e tokës e falsifikuar

Oficerët e policisë gjyqësore në Vlorë kanë sekuestruar në Gjendjen Civile dy çerifikata personale të dy shtetasve që sipas një kontrate paraqiten në cilësinë e shitësit, në një kohë që ata kishin ndërruar jetë shumë kohë përpara se kjo kontratë të përpilohej.

Një prej tyre është çertifikata e vdekjes e shtetases Elipniqi Ndini, e cila ka ndërruar jetë më datë 21 tetor 1995, ndërkohë që në këtë akt shitjeje rezulton të ketë hedhur firmën para noteres Mimoza Shehu, plot 14 vjet më vonë. Pra, në datën 11 nëntor 2009, edhe pse me letra rezulton që gruaja kishte ndërruar jetë, ajo ka firmosur.

Të njëjtin akt të papareçedentë e tregon dhe çertifikata e dytë e vdekjes, që i përket djalit të saj Jorgji Ndini, i cili në aktin e vdekjes ka ndërruar jetë më 20 shtator 2009, pra më shumë se dy muaj para kontratës së shitjes së truallit në të cilin është ndërtuar objekti i shumëpërfolur tashmë.

Kontrata e shitjes për truallin me sipërfaqe 1.663 metra katrorë është përpiluar mes 23 shitësve dhe dy blerësve në Tiranë dhe sipas polcisë, nisur nga dy çertifikatat e vdekjes që tregojnë se dy prej tyre nuk kanë qenë të pranishëm e për pasojë firma e tyre është false, tregon që i gjithë ky akt noterial është nul.

Banorët largojnë pajisjet
Të shtunën nisin punën xhenierët

Skadon të premten afati i lënë nga INUK për pronarët e apartamenteve në pallatin e ndodhur në Ujin e Ftohtë dhe që është lajmëruar se do të prishet.

Edhe sot ka vijuar heqja e pajisve nëpër apartamente nga ana e banorëve. Të shtunën, sipas drejtorit të INUK, Zyhdi Dajti, askush nuk do lejohet të hyjë më në ambjentet e kompleksit ‘Jon’ dhe objekti do merret në ruajtje nga INUK dhe policia.

Kjo është koha kur ekspertët xhenierë do nisin hapjen e vendeve ku do vendoset lënda shpërthyese që do shërbejë për shkatërrimin e kësaj godine. Edhe sot mjetet e rënda të INUK kanë vijuar me shkatërrimet në zonën ballore të kësaj ndërtese dhe të pishinës së saj. 

Top Channel