Thaçi e Daçiç propozohen për Nobel

23/12/2013 00:00

Një grup ligjvenësish amerikanë propozuan të hënën kryeministrat e Kosovës dhe Serbisë, Hashim Thaçi dhe Ivica Daçiç, si dhe Shefen e Politikës së Jashtme të Bashkimit Europian, Catherine Ashton si kandidatë për çmimin Nobel të Paqes për vitin 2014.

Në njoftimin e përbashkët Eliot Engel dhe Robert Aderholt, bashkëkryetarë të grupit të çështjeve shqiptare në Kongres si dhe Ted Poe dhe Emanuel Kliver, bashkëkryetarë të grupit të çështjeve serbe, kërkojnë që tre zyrtarët të nderohen me çmimin Nobel, për rolin e tyre kritik për normalizimin e marrëdhënieve të Kosovës me Serbinë.

Marrëveshja e prillit e këtij viti, mes dy kryeministrave, theksojnë ligjvenësit, shënoi një pikë kthese dramatike për Serbinë dhe Kosovën dhe për gjithë rajonin e trazuar të Ballkanit.

Që nga tetori i vitit 2012, deri në fund të këtij viti, dy kryeministrat janë takuar rreth 20 herë me ndërmjetësimin e zyrtares së lartë të BE-së, duke arritur të bien dakort për çëshjte delikate mes të dy vendeve.

Çështja e fundit për të cilën ata po përpiqen të arrijnë një kompromis është ajo për sistemin gjyqësor në komunat veriore të Kosovës me shumicë serbe.

Emërimet për çmimin Nobel mund të bëhen nga çdo individ ose organizatë e pranueshme për komitetin Nobel, ku përfshihen edhe ligjvënësit. Afati i emërimit është deri në muajin shkurt ndërsa fituesit shpallen në tetor.

Top Channel