Eksploziv në burgun e Drenovës

Lajmin e bëjnë të ditur autoritetet lokale, sipas të cilave sasia e lëndës eksplozive është gjetur në regjimin e brendshëm të burgut. Tritoli ishte me fitil por nuk ishte ndezur, saktësojnë burimet, të cilat shtojnë se lënda është gjetur gjatë një kontrolli rutinë.

Burgu i Drenovës ka qenë në qendër të vëmendjes së autoriteteve, pasi në nëntor të vitit 2013, 7 të dënuar arritën të arratiseshin nga ambjentet e tij. Katër prej tyre kishin dënim me burgim të përjetshëm, ndërsa tre të tjerët me dënime maksimale deri në 15 vjet burgim.

Muajin e kaluar në burgun në fjalë agjentët e kontrollit bllokuan katër fletë sharre të fshehura në një kuti shahu, që u përkisnin 4 të dënuarve që kishin lidhje me të arratisurit. Gjatë kontrollit u zbuluan edhe dy telefona celularë që u përkisnin dy të burgosurve të tjerë.

Kontrollet e herëpashershme në burgun e Drenovës bëhen jo vetëm për shkak të arratisjes së shtatë të dënuarve, që më vonë u arrestuan, por edhe për shkak të informacioneve të dërguara nga policia kriminale, se atje mbahen mes të dënuarve sende të ndaluara.

Në analizën vjetore të bërë muajin e kaluar nga institucionet përgjegjëse u vu në dukje çështja e arratisjeve, si dhe ajo e mbipopullimit të burgjeve.

Top Channel