Shkarkimet në polici, s’ka hetim

Vendimi është marrë pak kohë më parë, por zbardhja e tij ka mbetur e rezervuar dhe nuk është bërë publike. Në argumentimet e tij prokurori i çështjes ka sqaruar shkaqet për vendimin duke përcaktuar se në lidhje me emërimin e drejtorit të përgjithshëm të policisë Artan Didi, Këshillit të Ministrave i lindte e drejta pasi ish-drejtori Hysni Burgaj kishte dhënë dorëheqjen dhe se qeveria është organi kompetent shtetëror që duhet të përcaktonte në bazë të ligjit edhe zëvendësuesin e tij.

Sipas të njëjtit argument, thuhet se vendosja e Artan Didit në krye të policisë është kryer me akt administrativ të Këshillit të Ministrave dhe është akt i një organi kolegjial.

Në lidhje me dy nëndrejtorët e Policisë së Shtetit, Sokol Bizhga dhe Altin Qato, Prokuroria e Përgjithshme sqaron se, emërimi i tyre bëhet nga ministri pas propozimit të drejtorit të përgjithshëm.

Dhënë këtë rast, ish-drejtori Burgaj ka bërë propozimin konkret që është firmosur më pas nga ministri i Brendshëm Tahiri. Në këto kushte, thotë prokuroria, marrëdhëniet e krijuara nga urdhërat e ministrit janë të natyrës juridiko-administrative.

Për këtë arsye ankimimi i këtyre akteve duhet bërë tek kryeministri sipas Kodit të Proçedurës Administrative. Ankimi për këto urdhëra nuk është ai i tipit gjyqësor penal, por vetëm gjyqësor administrativ.

Në pikën e tretë, atë të emërimit të 12 drejtorëve në qarqe, prokurori ka sqaruar se asnjë emërim i tyre nuk është kompetencë e kryeministrit Rama dhe as ministrit të Brendshëm, Tahiri.

Sipas akteve, nuk figuron që urdhërat të jenë firmosur prej tyre, por nga ish-drejtori i përgjithshëm Hysni Burgaj, i cili në rastin konkret ka ushtruar funksionin e tij si drejtuesi më i lartë i policisë.

Top Channel