Meksikë, arrestohet “El Chapo” i drogës

Guzman ka qenë për një kohë relativisht të gjatë në krye të kartelit famëkeq të Sinaloas, që trafikon sasi shumë të mëdha kokaine në Shtetet e Bashkuara.

Ai ka qenë në arrati që prej vitit 2001, kur u arratis nga një burg i sigurisë së lartë i Guatemalës, i fshehur në një kosh rrobash dhe natyrisht i ndihmuar nga disa bashkëpunëtorë.

Sipas raportimeve të mediave të ndryshme, Guzman është arrestuar në shtetin e Sinaloas, falë një operacioni të marinës meksikane, e ndihmuar nga agjencia amerikane DEA.

Departamenti amerikan i Shtetit kishte ofruar një shpërblim prej 5 milionë dollarësh për këdo që do të ofronte informacione që do të çonin në arrestimin e tij.

Ndaj tij janë ngritur një sërë akuzash federale dhe drejtësia amerikane ka bërë të qartë ambicjen e saj për ekstradimin e tij nëse do të kapej. Bashkëpunëtorë të ndryshëm të Guzman janë arrestuar në dy vitet e fundit në Shtetet e Bashkuara dhe Meksikë.

Revista prestigjoze “Forbes” e ka renditur atë mes njerëzve më të pasur të planetit, me një pasuri rreth 1 miliard dollarë. Karteli i drejtuar prej Guzman është përgjegjës për mijëra vrasje dhe për një ndikim të madh në luftën e drogës që ka përfshirë Meksikën.

Vitin e kaluar ai u shpall armiku publik numër 1 nga autoritetet e Çikagos, ndërkohë që tentakulat e organizatës së tij përveçse në SHBA së fundmi kishin arritur Evropën dhe Australinë e largët. 

“Është me rëndësi që ai të ekstradohet në Amerikë, sepse po qëndroi në burgjet meksikane, ose do të arratiset sërish, ose do të drejtojë biznesin nga qelia”, e komentoi arrestimin një zyrtar nga Uashingtoni. 

Top Channel