“Gënjeshtra i ka këmbët e shkurtra”, thotë një proverb dhe në mbështetje të tij mbërrin një studim shkencor që zbardh kohën që i duhet trurit tonë për të dalluar një të tillë.
Një ekip studiuesish italo-amerikan, për të treguar se sa e shkurtër është jetëgjatësia e një gënjeshtre, vendosën 30 studentë përpara 280 fotografive. Në imazhe tregoheshin 8 aktorë profesionistë në gjendje të ndryshme emocionale. Fotot shoqëroheshin me përshkrime jo përkatëse për gjendjen që pasqyronin.
Gjatë vëzhgimit të fotove studentët u vunë nën monitorimin e tomografisë elektromagnetike, që shërbente për matjen e aktivitetit celebral. Nëpërmjet kësaj metode u arrit në përfundimin se trurit tonë i mjaftojnë 300 të mijtat e sekondës për kuptuar një gënjeshtër.
Studimi zbuloi gjithashtu se përgjegjës për ndarjen e së vërtetës nga gënjeshtra është korteksi i lobit frontal.
Raporti i plotë i studimit u publikua në revistën shkencore “Plos One” dhe në të studiuesit sqarojnë se objektiv i tyre ka qenë matja e kohës që i duhet trurit tonë për të kuptuar një gënjeshtër, jo për ta zbuluar atë.
Top Channel