Nikoliç: Për Serbinë s’ka më luftëra

Në një postim që ka bërë në rrjetin social Twitter, Nikoliç ka thënë se Austria ka qenë shembull për Serbinë me krijimin e një shteti modern dhe se historia e ka mësuar vendin e tij se, asnjë popull nuk duhet të turpërohet me bëmat që ka bërë dikush në emër të tij.

“Për Serbinë nuk ka më luftëra. Luftërat kanë marrë jetën e një të tretës së popullit tonë, kanë ndryshuar strukturën tonë gjenetike, ndërkohë që nuk kemi marrë atë që na ka takuar, edhe pse ishim në anën e fituesit. Për këtë arsye, për neve nuk ka më luftëra”, ka thënë Nikoliç, i cili ndodhet për një vizitë në Austri.

Ndërkohë, Beogradi zyrtar ka dënuar deklaratën e kryeministrit të Kosovës, Hashim Thaçi, se trupat serbe kryen genocid ndaj popullsisë shqiptare të Kosovës, duke i cilësuar ato si të pasakta, të papërgjegjshme e që nuk ndihmojnë në normalizimin e marrëdhënieve.

“Pyesim Thaçin dhe bashkësinë ndërkombëtare, si t’i quajmë krimet masive ndaj serbëve në Kosovë e Metohi, për të cilat askush nuk është përgjigjur dhe autorët e tyre prej dekadash janë pa emra e mbiemra? Si ta quajmë rrëmbimin e 300 serbëve dhe joshqiptarëve të tjerë, që sipas raportit të Dick Marty janë transportuar në Shqipëri, ku më vonë u janë marrë organet dhe shitur gjithandej në Europë?”, thotë Beogradi, që përmes këtij reagimi tenton të mbulojë krimet e veta ndaj shqiptarëve.

Top Channel