Tahiri: Gjyqtari na liron kriminelët

Duke iu drejtuar Presidentit, që mban postin e kryetarit të KLD-së, Tahiri shkruan: “Vendimet absurde dhe shpesh herë haptazi të kundraligjshme të këtij gjyqtari, përbëjnë shqetësime serioze për Policine e Shtetit, e cila gjendet e detyruar të luftojë kriminalitetin ndaj të njëjtëve njerëz që riciklohen të lirë në shoqëri nga vendime të tilla, tërësisht skandaloze.

“Me besimin që ndani të njëjtin mendim për pandëshkueshmërinë, i shkruan Ministri i Brendshëm Presidentit, mungesën e drejtësisë në disa segmente të gjyqësorit, ju lutem shqyrtoni materialin mbi këtë gjyqtar dhe vini në lëvizje të menjëhershme Këshillin e Lartë të Drejtësisë”.

Në rastet që ministri Tahiri i referon Presidentit, radhiten të dhëna në dy muajt e fundit, ku në dhjetë gjykime, gjyqtari Aliu i ka liruar të gjithë personat e arrestuar që i kanë shkuar për masë sigurie. Më të rëndat mbeten ato ku akuzat kanë qenë për përdhunim, trafik armësh, vjedhje, drejtim automjeti në gjendje të dehur e të tjerë.

Sipas ministrit Tahiri, vendimet më skandaloze kanë qenë në 5 shkurt, për lirimin e një shtetasi të  akuzuar për kryerje të marrëdhënieve seksuale me dhunë me të mitura, për të cilin prokurori kishte kërkuar arrest me burg. Në 12 shkurt, Gjykata e Apelit e rikthen në qeli.  

Në 7 shkurt, një shtetas i akuzuar për vjedhje, prokurori kërkoi arrest me burg, gjyqtari Aliu e liron pa asnjë masë sigurie dhe Gjykata e Apelit e rikthen të akuzuarin në burg, nën masën e arrestit.

Në 17 mars, prokuroria kërkon detyrim paraqitje për dhunë në familje, gjyqtari Aliu e vlerëson ndalimin të paligjshëm, e liron në sallën e gjyqit, çështja është apeluar.

Në 23 mars, cka është edhe më e rënda, një shtetas u lirua në sallën e gjyqit ndërsa prokurori ka kërkuar arrest me burg, pasi kundërshtoi forcat e policisë, u kap me armë gjahu e municione pa leje.

Gjyqtari nuk vendosi asnjë masë për të, e liroi në sallën e gjyqit.
Nisur nga kjo seri vendimesh, haptazi kundër ligjit, Ministri Tahiri kërkon marrjen e masave kundër këtij gjyqtari.

Nga Presidenca nuk ka ende një përgjigjje, por reagimi i parë ka mbërritur nga Ministria e Drejtësisë. Kreu i këtij dikasteri, Nasip Naço deklaroi nisjen e inspektimit ndaj gjyqtarit në fjalë. Naço tha se Ministria e Drejtësisë është e vendosur për të luftuar abuzuesit dhe korrupsionin në sistemin e drejtësisë.

Top Channel