Avioni, kapen sërish 2 sinjale të reja

Kërkuesit e fluturimit 370 të “Malaysia Airlines” kanë kapur edhe 2 sinjale të reja, për të cilat zyrtarët shpresojnë të vijnë nga sinjalizuesit e vendndodhjes së të ashtuquajturës “kuti e zezë” e avionit të zhdukur më shumë se 1 muaj më parë, me 239 pasagjerë në bord, teksa ishte nisur nga Kuala Lumpur drejt Pekinit.

Anija australiane “Ocean Shield” ka kapur fillimisht dy pulsime nënujore gjatë së shtunës, më pas nuk kishte kapur asgjë deri ditën e martë, teksa të mërkurën kapi edhe dy herë të tjera sinjalin e ngjashëm. Të katërta rastet janë brenda 17 miljeve detare nga njëra-tjetra.

“Besoj se jemi duke kërkuar në zonën e duhur, por ende duhet të vëzhgojnë ndonjë pjesë mbetjeje, përpara se të konfirmojmë me siguri se ky është vendi i fundit ku ka rënë MH370-ta”, tha marshall Angus Houston, shef i forcave ajrore, i cili po koordinon operacionet e Australisë.

Pjesa e dytë e lajmit të mirë? Autoritetet kanë analizuar sinjalet e kapura përgjatë fundjavës dhe kanë dalë në konkluzionin se ato vijnë me shumë mundësi nga pajisja specifike elektronike, ndryshe nga jeta detare që mund të lëshojë tinguj të ngjashëm.

“Ata besojnë se sinjalet janë korresponduese me specifikat dhe përshkrimin e të dhënave të regjistruara të fluturimit”, tha Houston. “Jam optimist se do ta gjejmë avionin, ose atë që mund të ketë mbetur nga avioni jo në një të ardhme të largët”.

E mërkura, në fakt, shënon ditën e 33 të kërkimeve për fluturimin 370, që humbi nga radarët më 8 Mars. Autoritetet ende vazhdojnë të shpresojnë se mund të gjejnë atë përmes sinjaleve të kutisë së zezë.

Megjithatë, ka edhe një element disi frikësues, pasi energjia e baterisë së regjistruesve të vendndodhjes së fluturimeve, janë thuajse të certifikuara për të lëshuar sinjale të forta deri në 30 ditë pasi përfshihen nga lagështira.

“Sinjalet janë duke u dobësuar”, tha Houston, “gjë që nënkupton se ose po i largohemi zonës së kërkimit, ose bateritë e lëshimit të sinjalit janë duke mbaruar”.

Top Channel