Hetimet për varrezën masive

Gjashtë mbetje mortore janë gjetur, dy prej të cilave janë konfirmuar se u përkasin viktimave nga Kosova. Mbi varrezën masive është ndërtuar një objekt dhe gjurmët janë fshehur.

Ajo ka qenë pjesë e dyshimeve, por edhe mohoimeve se aty mund të ndodheshin mbetjet mortore të shqiptarëve nga Kosova. Bruno Vekariç, zv.prokuror i përgjithshëm në gjykatën për krime lufte në Beograd, thotë se procesi do të jetë profesional.

“Përputhja apo identifikimi që është bërë tregon se nga janë dy trupat e identifikuar. Dhe ne kemi filluar proçedurat parahetimore që është e rëndësishme për gjetjen e autorëve. Është e vështirë të vlerësohet se çfarë gjendet në këtë lokacion, por është ndërmarrë gjithçka e nevojshme dhe pasi ta dimë se sa kufoma janë do vendosim se nga do të vazhdojë procesi. Kjo është një varrezë dytësore”, deklaron Vekariç.

Pas pastrimit të terrenit, gërmimet pritet të fillojnë javën e ardhshme. Sipas Vekariç, ka shumë pyetje për të ndjekur që i takojnë prokurorisë, por është e qartë se bëhet fjalë për krime lufte.

“Hapet çështja sesi dikush ka ndërtuar shtëpi në këtë lokacion? Është e qartë që jo vetëm që janë fsheur gjurmët nga frika, por ka pasur një infrastrukturë të kompletuar dhe ne do të hetojmë. Sapo të kemi edhe dëshmitë më të vogla për rastin do të ndërmarrim hapa, pasi është e qartë që bëhet fjalë për një krim lufte”, thekson Vekariç.

Top Channel