Turqia: Vrasja e armenëve, çnjerëzore

Në një deklaratë të lëshuar në prag të përvjetorit të 99-të të vdekjeve të kontestuara gjerësisht, Erdogan e përshkroi papritur atë event të 1915-s si “çnjerëzore”, duke përdorur gjuhën më pajtuese se kurrë më parë, pasi kjo çështje nuk ka qenë e njohur nga liderët turq.

Zyrtarë të qeverisë turke thanë se ishte hera e parë që një kryeministër turk ka ofruar ngushëllime të tilla të sinqerta, dhe e përshkruan deklaratën si një hap historik, por fjalët e Erdogan-it u hodhën poshtë si “të ftohta dhe cinike” nga një grup armenësh influencues me bazë në SHBA.

Natyra ekzakte dhe shkalla e asaj që ndodhi gjatë luftimeve, që nisën në 1915-n, është tepër i diskutueshëm dhe vazhdon të prekë marrëdhëniet mes Turqisë dhe Armenisë, një ish-republikë sovietike.

Turqia pranon se shumë armenë u vranë në ato përplasje, por mohon se janë vrarë rreth 1,5 milionë dhe se ky veprim përbën një akt genocidi, një term i përdorur nga shumica e historianëve perëndimorë dhe parlamentet e vendeve të tyre.

Më herët gjatë Prillit, një rezolutë e komitetit të Senatit amerikan e quajti masakrën ndaj armenëve si një genocid.

Deklarata e Erdogan, – si kurrë më parë e lëshuar në 9 gjuhë të botës, përfshi edhe gjuhën armene, – ka ripërsëritur thirrjet e kaluara për dialog mes dy vendeve, si dhe ngritjen e një komisioni historik për të vërtetuar gjithçka në lidhje me vrasjet.

“Me këtë shpresë dhe besim, ne duam që armenët, të cilët humbën jetën në fillim të shekullit të 20-të, të prehen në paqe. U shprehim ngushëllimet më të sinqerta nipërve dhe mbesave të tyre”, tha ai.

“Duke qenë se kmi kaluar ngjarje, të cilat kanë sjellë pasoja çnjerëzore – siç ishte edhe zhvendosja – gjatë Luftës së Parë Botërore, nuk duhet të lejojmë që turqit dhe armenët të mos krijojnë qëndrime reciprokisht njerëzore dhe të dhimbshme mes njëri-tjetrit”.

Top Channel