Hollande: Dështova me papunësinë

Kështu ka deklaruar presidenti francez Francois Hollande, në një fjalim të transmetuar direkt në radion dhe televizionin publik, dy vjet nga zgjedhja e tij në krye të pallatit Elize.

“Nuk kam asgjë për të humbur, por Franca duhet të fitojë”, ka vijuar Hollande me fjalimin e tij, ku i është përgjigjur edhe interesit të medias për një rikandidim të tij.

“Nëse në fund të mandatit do të kem dështuar me rritjen ekonomike, papunësinë dhe rilindjen e vendit, si do të mund të them që kam një zgjidhje për të ecur përpara?” ka thënë Hollande.

Të dhënat qeveritare të publikuara muajin e kaluar tregonin se ekonomia franceze ishte rritur me 0.3% në tremujorin e fundit të 2013-s.

Një rritje e tillë e lehtë ndihmoi ekonominë e dytë më të madhe të Europës që të shmangte reçesionin, duke regjistruar gjithashtu një rritje prej 0.3% të Prodhimit të Brendshëm Bruto për të gjithë vitin e shkuar marrë bashkë.

Parashikimet e Bankës Qëndrore Franceze flisnin për një kontraktim prej 0.1% në periudhën tetor-dhjetor 2013.

Ndonëse rritja mbetet ende e dobët, këto të dhëna konfirmojnë besimin se ekonomia e Eurozonës po nis një proces të gjatë rimëkëmbjeje, në të cilën Franca pritet të luajë një rol kyç.

Top Channel