Zgjedhjet në Greqi, Syriza në avantazh

Kështu sipas exit polls -eve të regjistruara në qarkun më të madh të vendit, në Atikë, ku votojnë 30% e grekëve, përfaqësuesja e Radikalëve të Majtë, Rena Dourou, në formacionin e së cilës bënë pjesë edhe aktori dhe regjisori i njohur Laert Vasili, siguron nga 27-31% të votave ,e ndjekur nga kandidati që vjen nga radhët e socialistëve grekë, Janis Zgoyros me 20-24 %.

Ndërsa përfaqësuesi i Demokracisë së Re duket se nuk mund të jetë rival në raundin e dyte. Të njëjtën pamje japin rezultatet paraprake të publikuara nga kompanitë e sondazheve pas mbylljes së votimit  edhe për dy bashkitë më të mëdha të vendit, atë të Athinës dhe atë të Pireut.

Në Athinë përfaqësuesi i Syriza-s, me kryebashkiakun në fuqi Giorgos Kaminis, do të përballen në raundin e dytë, duke lënë edhe këtu jashtë betejës politike rivalin e Demokracisë së Re.

Ndërsa në Pire konservatorët duket se do ta humbasin bashkinë që mbanin në katër vitet e fundit. Edhe në qarkun e Maqedonisë Qendrore kryeson, përballë kandidatit të Demokracisë së Re ,rivali  tjetër i ardhur edhe ai nga gjiri i të djathtëve, ndërsa për Bashkinë e Selanikut duke se ka një epërsi të dukshme ndaj konservatorëve, por dhe radikalëve të majtë, kryebashkiaku në detyrë, Janis Butaris.

Vlen gjithashtu të përmendim se në qarkun e Atikes kandidati i Agimit të Artë ka siguruar sipas rezultateve paraprake nga 9-11% të votave, ndërsa numri dy i kësaj force politike që kandidonte për Bashkinë e Athinës, Ilias Kasidiaris ka mundur të përqendrojë nga 14 deri në 17% të votave.

Gjithësesi duket se çdo gjë do të vendoset të dielën që vjen, në raundin e dytë të këtyre zgjedhjeve, bashkë me ato për PE-në, por mesazhi kryesor që vjen i qartë për koalicionin Samaras -Venizelos, është pakënaqësia e grekëve për politikat e ashpra dhe reformat e ndjekura prej kësaj qeverie.

Top Channel