“South Stream”, penalizim për Bullgarinë

Koncerni rus “Gazprom” kontrollon 50 përqind të të gjithë rrjetit “South Stream”, duke përfshirë edhe tubacionet në Bullgari. Por, kjo bie ndesh me të ashtuquajturën “Paketë e Tretë Energjitike” e BE.

Këtu bëhet fjalë për kërkesën e bllokut, që prodhimi i gazit të ndahet nga transporti dhe shpërndarja e tij, për të mos dëmtuar konkurrencën. Veç kësaj, porosia e ndërtimit në Bullgari iu dha një konsorciumi të afërt me sipërmarrjen ruse “Stroytransgaz”, thotë “Deutsche Welle”, e ajo nuk është vetëm një bijë e “Gazpromit”, por ndodhet edhe në listën e sipërmarrjeve që preken nga sanksionet e Shteteve të Bashkuara.

Pas një bisede me tre senatorë amerikanë, kryeministri i Bullgarisë Plamen Oreshanski shpalli ngrirjen e “South Stream”-it, për aq kohë sa nuk janë sqaruar rezervat e BE.

Njëkohësisht me këtë zhvillim, dy partitë në qeveri, socialistët e BSP dhe Partia e minoritetit turk DPS, janë shprehur për zgjedhje të parakohshme parlamentare, vetëm një vit pas marrjes së postit nga Oresharski.

Për ekspertët, ndërprerja e përkohshme e punës në këtë projekt e dëmton qeverinë e Sofjes. Pjesëmarrja në “South Stream” hap, pikërisht për Bullgarinë, mundësinë e përfitimit nga zbritjet e çmimit të gazit rus.

Veç kësaj, meqenëse gazsjellësi do ta anashkalojë Ukrainën, për Bullgarinë rritet siguria e furnizimit, pasi vendi varet nga Moska në masën 90% për plotësimin e nevojave të tij me gaz. Nga “South Stream”, bullgarët shpresojnë të kenë një investim gjigant prej miliarda eurosh, e në përputhje me këtë edhe shumë vende pune të reja.

Top Channel