Si të gatuajmë në natyrë, “sekretet” për një zgarë perfekte

Disa sekrete për këtë do të na i tregojë për “Pasdite në Top Channel”, Fabien Lerua, specialiste e kuzhinës belge, e cila, elementin kryesor në restorantin e saj këtu në Shqipëri, ka zgarën.

“Sekreti është te përdorimi i qymurit të drurit. Duhet ta ndezësh barbekjynë 45 minuta deri 1 orë para se të fillojë pjekja, si dhe duhet pjekur me prush, jo me flakë”.

Atëherë kur prushi është ndezur uniform, ka një ngjyrë të kuqërremtë dhe, siç e theksoi kryekuzhinierja, nuk ka më flakë, është momenti për të filluar pjekjen. Një këshillë e vlefshme në këtë moment është lyerja e zgarës me vaj, për të mos u ngjitur mishi.

Nje element shumë i rëndësishëm, për të gatuar ushqim sa më të shijshëm, është edhe nxehtësia, apo më saktë largësia e zgarës nga prushi, në varësi të produktit që pjekim.

Fjala vjen, nxehtësia për të pjekur mish është e ndryshme me atë që duhet kur pjekim peshk. Nëse për pjesën me të madhe të ushqimeve duhet një largësi nga prushi rreth 10 centimetra, për peshkun duhet 20 cm, por dhe kjo është në varësi të llojit të peshkut.

Fabien na tregon se edhe këtu ka një sekret. Duhet të dimë radhën e vendosjes së ushqimeve në zgarë, sipas kohës së pjekjes.

“Fillimisht duhet mbajtur një distancë prej së paku 10 cm mbi prushin. Mishi mund ta pjekësh të gjithë bashkë, menjëherë, por duhet të vendosësh pulën fillimisht, sepse kërkon më shumë kohë. I dyti në radhë vendoset mishi i derrit, sepse kërkon rreth 20 minuta për pjekje, dhe duhet ta pjekësh njëtrajtësisht, jo të digjet. E treta vendoset bërxolla e viçit, që kërkon 8 minuta për pjekje, nga 4 minuta për secilën anë. Dhe në fund lihen salçiçet, pasi këto nuk duan shumë kohë”, thekson Fabien.

Shefja e kuzhinës tregon se një ndër gabimet, që bëjmë shpesh kur pjekim në zgarë, është se mishit i hedhim kripë para se ta vendosim për ta pjekur. Kjo e bën mishin të humbasë lëngjet dhe shijen. Kripa duhet hedhur, pasi e largojmë mishin nga zgara, dhe ta lëmë disa minuta në qetësi para se të shërbehet.

Perimet, për shkak të brishtësisë së tyre, është mirë të piqen në anët e zgarës, pasi kërkojnë relativisht më pak nxehtësi. Ndërkohë për disa perime të tjera, si patate apo misër, që kërkojnë më shumë kohë për t’u gatuar, Fabien rekomandon që t’u japim një valë përpara se t’i vëmë në zgarë.

Më interesantja është se në zgarë mund të bëhet gjithçka. Madje dhe frutat.

“Në fund janë edhe frutat barbekju, të cilat nuk duan shumë nxehtësi”…

Dhe këtu është mirë, që shkopinjtë t’i lëmë në ujë disa minuta përpara, që të mos na digjen kur t’i pjekim.

“Sa e përhapur është barbekjyja në Belgjikë? Atje nuk ka shumë diell, por kur ai del, të gjithë dalin nëpër bahçe ose kopshte dhe përdorin barbekjynë”, thotë Fabien.

Ndërsa ne, këtu në Shqipëri, me diellin që kemi, mund ta shfrytëzojmë shumë shpesh barbekjynë, këtë mënyrë gatimi që, megjithëse është trend i viteve të fundit, në të vërtetë është forma më e lashtë e gatimit. Dhe tani çdo gjë është gati.

Top Channel