Trendi i ISIS për rrjetet sociale

Pas njoftimit të administratorit të Twitter, Dick Costolo, që ka vendosur të pezullojë çdo profil që përmban videon e vrasjes së gazetarit amerikan Jack Foley dhe pas vendimit analog të YouTube, njerëzit e Al Bagdadit janë vënë në punë për të gjetur mjete të reja propagande.

Sipas faqes amerikane të internetit, Vocativ, pesë janë piketat e strategjisë së re. Në të parën dhe në të dytën parashtrohet hipoteza e zhvendosjes së komunikimit në platforma të tjera që të mos jenë Twitter dhe YouTube.

Në të tretën hipotizohet edhe krijimi i një serveri alternativ që të mund të menaxhojë komunikimet e Shtetit Islamik. Më pas vjen thirrja për të sabotuar kanalet televizive perëndimore sepse konsiderohen imoralë dhe të gjehet një mjet alternativ për platformën JustPaste, për publikimin e komunikatave.

Ndërkohë, xhihadi është spostuar në Google+ dhe Linkedin, rrjete të tjera sociale shumë të përdorura por më pak të reklamuara. Në G+ shfrytëzohen edhe funksionet e opsionit “Picasa” për shpërndarjen e fotove dhe Google Calendar për të caktuar betejat.

Ndërsa në Linkedin është krijuar një profil me listën e të gjithë liderëve të ISIS-it, përfshirë ata të rënë në betejë. Një tjetër rrjet social i përdorur është Vkontakte, platforma e dytë përsa i përket numrit të abonentëve në Evropë dhe shumë i përhapur në Rusi. Këtu janë transferuar kryesisht profilet në Twitter, duke bërë “copy-paste” edhe linqet që ndodheshin në të.

Megjithatë, jeta e ISIS në rrjete rrezikon të bëhet më e vështirë. Themeluesi i Diaspora, një tjetër platformë e tipit “open source” dhe prej kohësh e shumëpërdorur, ka deklaruar se është në punë për largimin e ISIS nga faqja e saj.

Top Channel