“Papa në Shqipëri, në gjurmët e Nënë Terezës”

Jo pa qëllim, për të përshkruar vizitën e Atit të Shenjtë më modeste e të përulur, siç është shfaqur që në fillim, mediat franceze përfshijnë edhe këtë detaj; përulësinë, largimin prej luksit e afrimin shpirtërisht me tjetrin, i cilitdo besimi qoftë ai. Siç bënte, në fund të fundit, edhe shqiptarja e madhe Nënë Tereza.

Ndaj dhe titulli i një shkrimi online është pikërisht ky: Papa Françesku në Shqipëri, në gjurmët e Nënë Terezës.

Me mijëra vetë mbushën qendrën e Tiranës, në sheshin që mban emrin e bamirëses së paharruar, vendi i zgjedhur për meshën e shumëpritur. “Kisha katolike shqiptare është një kishë martire dhe me këtë vizitë të Shenjtërisë së Tij, Papa Françeskut, vendin tonë do ta njohë e gjithë bota mbarë”, citohet të ketë thënë një besimtare katolike 51-vjeçare.

Në të njëjtin shkrim vjen edhe komenti i një besimtari musliman 85-vjeçar, i mbërritur në Tiranë nga Laçi me disa pjesëtarë të tjerë të familjes së tij, posaçërisht për këtë rast.

“Ne i përkasim një komuniteti tjetër fetar, – thotë ai, – por për respekt dhe mirënjohje erdhëm këtu, të marrim bekimin papnor. Vetë Papa argjentinas, gjatë fluturimit i tha gazetarëve: Shqipëria është një vend që ka vuajtur shumë, por që megjithatë arriti të gjente paqen mes feve të ndryshme të saj”.

“Ky ekuilibër në favor të qeverisjes është një shenjë e mirë për botën”, kanë qenë fjalët e tij. Vetë kardinali Pietro Parolin, Sekretar shteti i Vatikanit, e shpjegoi kaq thjesht thelbin e kësaj vizite: që feja, – tha ai, – të mos jetë më kurrë arsye konflikti.

Që në udhëtimin e tij drejt Koresë së Jugut, Papa Françesku e kishte shpjeguar ndalesën e vet në “vendin e shqiponjave” me shumicë muslimane, me ekuilibrin fetar që mbizotëron këtu. Prania e Papës, – shkruajnë mediat franceze, – do të shërbejë për t’i treguar të gjithë popujve të botës se bashkëpunimi është i mundur.

Top Channel