E vërteta e mbështetjes së ISIS

Në një analizë të botuar në versionin online të BBC, Michael Stephens, drejtor i Institutit të Shërbimeve Mbretërore në Katar, thotë se marrëdhënia e vendeve të Gjirit me ISIS është e komplikuar.

“Shumë është folur për mbështetjen e donatorëve dhe simpatizantë të veçantë ndaj ISIS në vendet e Gjirit dhe akuzat që dëgjoj më shpesh janë ato të drejtuara ndaj Katarit, Arabisë Saudite dhe Turqisë si fajtore të vetme për krijimin e kalifatit”, thotë Stephens.

Ky është një variant i thjeshtëzuar, por e vërteta është shumë herë më komplekse, shton ai. Për Stephens mbështetja e disa personave të pasur në vendet e Gjirit ndaj ISIS është e pamohueshme, por kjo ka ndodhur në të shkuarën kur këto vende shihnin luftëtarët e grupeve islamike sunite si një mundësi e mirë për të rrëzuar nga pushteti Bashar al-Assad dhe shiitët në Siri.

Miliona dollarë të thatë janë transportuar me çanta nëpërmjet Turqisë për grupet Liëa al-Taëhid, Ahrar al-Sham dhe Jaish al-Islam, që të tre grupe që luftonin Bashar al-Assad dhe që të tre të lidhura me krahun e Al Kaedas në terren, Al-Nusran, por duke ruajtur mëvetësinë e tyre.

Me zgjatjen e konfliktit Al-Nusra fitoi më shumë terren dhe këto grupe u njehsuan me të duke çuar në zgjerimin e kësaj organizate terroriste aq sa ishte e vështirë të kontrollonte veten e saj. Pikërisht nga radhët e saj dolën edhe “ajka e ekstremistëve” që formuan ISIS. Sot vetë Al-Nusra ka dënuar disa prej krimeve të këtyre radikalëve fetarë.

Në mënyrë të tërthortë vendet e Gjirit që iu bashkuan sulmeve amerikane ndaj fortesave të ISIS në Siri, pranojnë dështimin e strategjisë për të rrëzuar Basha al-Assad, ndërkohë që ky i fundit muaj më parë kishte deklaruar se “mikpret bombardimet ndërkombëtare ndaj terroristëve”, që i sheh si një mundësi të artë për t’i dhënë fund njëherë e përgjithmonë konfliktit disa-vjeçar në vend.

Top Channel