Franca fajëson Turqinë për “bllofin” me xhihadistët

Agjentët e sigurisë ishin duke pritur në një aeroport të Parisit, ndërkohë që 3 të dyshuarit zbritën në Marsejë, në Jug të Francës, ku arritën të largoheshin nga aeroporti të pasfiduar nga forcat e sigurisë.

Ministri francez i Mbrojtjes, Jean-Yves Le Drian, ka bërë të ditur se këtu ka ndodhur një ngatërresë. 3 të dyshuarit janë dorëzuar në policinë e qytetit jugor të Francës, dy prej të cilëve kanë lidhje me vrasësin masin islamik, Mohamed Merah, i cili u vra pas një ofensive të policisë në vitin 2012.

Ata të tre besohen se i përkasin një rrjeti rekrutimi xhihadistësh dhe konsiderohen të rrezikshëm nga shërbimet franceze të sigurisë, raporton media franceze.

Imad Djebali, një shok fëmijërie i Merah, u burgos me 4 vjet për terrorizëm në 2009-n, ndërkohë që Abdelouahed Baghdali, i cili është i martuar me motrën e Merah, Souad, njihet nga policia për lidhjet e tij me një shkollë islamike.

I treti, Gael Maurize, njihet nga inteligjenca franceze për “implikimin e tij në një rrjet xhihadistësh”, deklaron media franceze.

Sipas “Le Monde”, të tre ata u nisën drejt Sirisë në Shkurt për t’iu bashkuar grupit të Shtetit Islamik, por u zhgënjyen dhe iu dorëzuan policisë turke në kufi, në fund të Gushtit, duke kërkuar riatdhesimin në Francë. Ata u ndaluan për 3 javë për “shkelje të të drejtës për banim”.

Të martën, kapiteni i avionit që duhej t’i niste ata nga Stambolli drejt Parisit refuzoi t’i lejonte në bord, për shkak se atyre u mungonte dokumentacioni i nevojshëm nga Turqia. Ndërsa policia turke i kishte hipur në fluturimin e radhës, drejt Marsejës, pa informuar kolegët e tyre francezë.

Top Channel