Ndihmuan pas sulmeve të 11 Shtatorit, ndërrojnë jetë në të njëjtën ditë

Lejtnant Howard Bischoff, 58 vjeç, dhe zjarrfikësit Robert Leaver, 56 vjeç, e Daniel Heglund, 58 vjeç, ndërruan jetë gjatë së hënës, me vetëm pak orë diferencë nga njëri-tjetri.

Mijëra njerëz, të cilët ndihmuan gjatë përpjekjeve të shpëtimit në atë 11 Shtator, janë diagnostikuar me sëmundje të ndryshme, përfshi kancerin. Por, doktorët thonë se është ende e paqartë nëse sëmundjet duhen të lidhen me sulmet e atëhershme.

Një zyrtar i zjarrfikëses, Daniel Nigro, i përshkroi vdekjet e 3 personave si një “kujtesë e dhimbshme, që edhe pas 13 vitesh ne paguajmë një çmim të shtrenjtë dhe të tmerrshëm për përpjekjet heroike të departamentit tonë”.

“Gjatë asaj dite, kur mbërritën ndihmësit e parë, ajri ishte i mbushur me lëndë toksike dhe mbeti i tillë për shumë muaj pas ngjarjeve”, tha presidenti i Federatës së Oficerëve në Uniformë të Zjarrfikësve, James Lemonda.

Rreth 1 mijë viktima janë lidhur me sëmundje të shkaktuara prej pluhurit toksik, që u ngrit nga rrënojat në “Ground Zero”. Shumë prej atyre që ishin në vendngjarje kanë vuajtur me kalimin e viteve nga sëmundje respiratore, ndërsa qindra prej ndihmësve të parë janë diagnostikuar me kancer.

Por, pavarësisht këtyre shifrave, asnjë lidhje e qartë mes sulmeve dhe kancerit nuk është zbuluar deri më tani. Studimet mjekësorë nuk kanë raportuar prova mbi rritjen e konsiderueshme të normave të kancerit ndaj atyre personave që patën lidhje me sulmet e 11 Shtatorit, edhe pse raportimet qeveritare kanë sugjeruar se punonjësit u ekspozuan ndaj kimikateve të ndryshme, që mund të shkaktojnë kancer.

Departamenti i Zjarrfikëses në Nju Jork ka bërë të ditur se, veç 343 punonjësve që ndërruan jetë ditën e sulmeve, edhe 89 të tjerë kanë vdekur si pasojë e sëmundjeve.

Top Channel