Nxënësit shqiptarë në protestë

Edhe pse të barabartë për nga numri, nxënësit shqiptarë të klasave të para mësojnë vetëm në një paralele, ndërsa bashkëmoshatarët e tyre maqedonas janë të shpërndarë në tri klasë. Trajtimi i këtillë jo i barabartë, sipas Këshillit të Prindërve, është margjinalizim dhe shkelje e të drejtave themelore të nxënësve shqiptarë për të mësuar në kushte normale.

“Kërkojmë formimin edhe të një paralele me mësim në gjuhën shqipe, duke patur parasysh numri i nxënësve shqiptarë i cili sillet rreth 30 e që mësojnë vetëm në një paralele, kurse numrit i nxënësve maqedonas sillet në 20, por janë të shpërndarë në tre paralele”, thotë Rexhail Aziri, Këshilli i Prindërve të nxënësve shqiptarë.

Këshilli i prindërve, që i prinë protestave kërkon nga drejtoria edhe respektimin e gjuhës shqipe konfrom ligjit dhe emërimin e një ndihmës drejtori shqiptar. Për këto probleme në këtë shkollë, prindërit e nxënësve fajësojnë edhe këshilltarët shqiptarë në Komunën e Kumanovës.

“Kërkojmë zbatimin e ligjit për arsim fillor, neni 13 dhe 14, gjegjësisht emri i shkollës, vula dhe mbajtja e mbledhjeve në Këshillin prindëror të shkollës të jenë edhe në gjuhën shqipe. Çështja e mos përfaqësimit adekuat në organet udhëheqëse të shkollës, administratë, bashkëpunëtor profesional, pedagog, psikolog, defektolog, stafi teknik, asnjë shqiptarë”, shton Aziri.

Gjatë një bashkëbisedimi me gazetarë, drejtori i shkollës ‘Toli Zordumis’ Boban Gjorgjiev është shprehur i gatshëm për të respektuar dygjuhësinë dhe për të emëruar një ndihmës drejtor shqiptar, ndërsa për hapjen e një paralele shtesë sipas tij, duhet të vendosë Këshilli Komunal. Por, pavarësisht këtyre premtimeve, prindërit e nxënësve shqiptarë janë skeptik se kërkesat e tyre do të përmbushen, pasi siç thonë, problemi është i vjetër dhe premtimet e drejtorëve të kësaj shkolle gjithmonë nuk janë mbajtur.

Top Channel