“Made in Albania”, aksesorë mode me materiale të leshta

Kjo spile, këta vathë, kjo çantë, pse jo dhe kapelja, janë krijime unike të bëra në mënyrë artizanale. Ato sjellin shijen e hollë të tendencave më të fundit të modës, por janë prodhime shqiptare.

Nuk kanë një markë dhe, ç’është më e bukura e tyre, ato e kanë origjinën nga pjesa rurale e vendit. Në ato zona, ku leshi i deleve hidhej dhe nuk shfrytëzohej për përfitim të mëtejshëm, një grup stilistësh kanë bërë të mundur futjen e këtij materiali në një zinxhir prodhimi. Dhe rezultati ka sjellë vepra të vërteta arti.

Materialet e këtyre suvenireve dhe aksesorëve e kanë origjinën nga Bjeshkët e Kukësit, nga pika e Çajës. Banorët e zonës, të trajnuar dhe nën monitorimin e specialistëve të tekstileve e stilistët, kanë mundur të përpunojnë lëndën e parë. Madje, një pjesë të këtyre suvenireve dhe aksesorëve e kanë realizuar vetë gratë e zonës.

Të bukura dhe shumë tendencë, këto produkte artizanale tashmë synojnë tregun ndërkombëtar të modës.

Top Channel