Gruaja e dhunuar: Ja pse e fala burrin pas denoncimit

Ju jeni pre’ e dhunës bashkëshortore. Sa kohë kishit e martuar?

Kam 10 vite e martuar. Nga kjo martesë kam një djalë 8 vjeç dhe një vajzë 5 vjeç.

Kur nisën konfliktet?

Kanë nisur dy vitet e fundit. Gjendja ekonomike jo e mirë çoi në xhelozi.

Ai punonte?

Me raste. Po e shtynim me borxhe, ndërsa 6 vitet e para të martesës kanë qenë më të mira. Pasi më vdiqën prindërit që më ndihmonin ekonomikisht, u detyrova të punoja vetë nëpër kazino apo kamariere për të mbajtur dy fëmijët.

Burri ka qenë i dhunshëm që në fillim të marrëdhënies suaj?

Jo, nuk ka qenë aspak i dhunshëm, u bë më vonë.

Sa herë është treguar i dhunshëm?

Kanë qenë 2-3 raste pasi nisa punën në kazino. Aty lindën xhelozitë.

Kur e more vendimin për ta denoncuar dhe pse?

Ai pinte ndonjëherë dhe kur ishte i pirë niste të bënte fjalë dhe fjalët pasoheshin nga dhuna fizike. Më kërcënoi edhe tek fëmijët dhe unë për këtë arsye e denoncova në polici.

Kaluan disa kohë dhe vendose ta falësh. Pse?

Ai nuk ka qenë një person i dhunshëm dhe me të kam dy fëmijë. Për hir të fëmijëve e kam falur sepse fëmijët kanë nevojë për baba, sado i keq të jetë ai.

Heqim pjesën e atësisë, e dëshiron bashkëshortin tënd në familje?

Edhe unë e dua burrin në shtëpi. Cdo gjë që ka bërë, unë ia kam falur. Ai është penduar, po ashtu edhe unë.

Ti e ke falur, por ai e ka marrë tashmë dënimin e tij nga gjykata. Mendon që kjo mund të ngjallë reagime të mëvonshme nga ana e burrit? Ke frikë nëse ai del nga burgu?

Jo, pasi më ka dhënë fjalën se nuk do përsërisë më gabimet.

Top Channel