Haga, asnjë akuzë Izraelit për “Mavi Marmara”

Fatou Bensouda e deklaroi këtë, pavarësisht “se ekziston një bazë e arsyeshme për të besuar se janë kryer krime lufte në anijen Mavi Marmara”. Sipas saj, Gjykata e Hagës (ICC) duhet të prioritizojë krimet e luftës të kryera në shkallë të gjerë.

Nëntë aktivistë turq janë vrarë në bordin e asaj anijeje, e cila po përpiqej të thyente bllokadën e vendosur nga Izraeli ndaj territorit të kontrolluar prej Hamasit. Në të njëjtin incident, 10 ushtarë izraelitë u plagosën, një situatë që shkaktoi një çarje të thellë mes Izraelit dhe Turqisë, dikur vende aleate.

Bensouda tha se nuk dëshiron të pakësojë “impaktin e krimeve të dyshuara të kryera ndaj viktimave dhe familjarëve të tyre”, por shtoi se ajo ka për detyrë të udhëhiqet nga Statuti i Romës, traktati themelues i ICC-së.

“Kam dalë në konkluzionin se çështja e mundshme që mund të lindë nga një hetim mbi këtë incident, nuk do të jetë i “rëndësisë së mjaftueshme” për të justifikuar veprime të mëtejshme nga ICC”, tha ajo në një deklaratë.

Bensouda i është referuar raportimeve mbi hetime të ndryshme që janë ekzaminuar në të kaluarën mbi këtë incident, përpara se të merrte vendimin e saj.

Top Channel