Nga obez në instruktor palestre…

Jo rrallë herë kanë ndikuar në vendimmarrje apo në stilin e jetesës së njëri-tjetrit, që nuk ishte gjithmonë i shëndetshëm. Aspak aktivitet fizik, shumë ushqim të shpejtë e ëmbëlsira për të shoqëruar pasditet. Deri sa dyfishuan peshën e tyre, por sot kanë 30 kilogramë më pak.

Enea, para 4 vitesh mori vendimin se duhet të bënte diçka me veten dhe të mos abuzonte më me ushqimin. Problemet shëndetësore filluan të rëndoheshin; gërhitje, të vjella, këmbë të fryra, probleme me shtyllën kurrizore etj. Në atë kohe ishte 125 kg. Të gjithë i thonin “e sheh veten sa je bërë?”. Nuk bënte aktivitet fizik e ushqehej keq.

Pasi mori vendimin, ndryshoi kryekeput stilin e jetesës: vrap në natyrë. Vëllai ishte mbështetësi kryesor për nismën e tij. Veshja e tij ishte XXL (pantallonat 52-54). U tërhoq nga bota, nuk donte të dilte në shoqëri, pasi kishte frikën se do të paragjykohej prej peshës së tij.

Pasi u dobësua ka kuptuar se sa e rëndësishme është pamja e jashtmë. Dikur ato që e refuzonin, sot i ka “shoqe”. Humbi 32 kg për një vit, tani e mban peshën 93 kg dhe nga intensiteti i punës filloi të lexonte e u përkushtua aq shumë, sa që sot është instruktor palestre.

Eduardi, shoku i tij, duke parë rezultatet dhe meqë miku i tij i fëmijërisë u bë instruktor, u regjistrua në palestër e ka humbur gjithashtu 20 kg, nga 95 në 75 kg. Nuk ka të njëjtin vullnet e përkushtim që ka Enea, por rezultatet janë të dukshme dhe ka ndryshuar shumë stilin e jetesës.

Doriani nuk kishte këtë shqetësim, ai ishte nën peshë, por nuk bënte një jetë të shëndetshme. Pasi shokët e tij po formonin një trup të bukur, edhe ai iu fut palestrës. Sot rezultatet janë të dukshme.

Top Channel