Irak, ushtria dëbon ISIS nga rafineria e naftës

Deklarata vjen një ditë pasi zyrtarët deklaruan se kishin marrë nën kontroll qytetin e afërt Baixhi, i cili që prej qershorit ishte nën sundimin e militantëve.

Komandanti i lartë i ushtrisë amerikane, gjenerali Martin Dempsey ka mbërritur ndërkohë në Irak për një vizitë të paparalajmëruar.

Bëhet fjalë për vizitën e tij të parë që kur koalicioni i udhëhequr nga Shtetet e Bashkuara nisi fushatën e sulmeve kundër militantëve islamikë.

Mbi 1 mijë forca amerikane joluftarake janë dërguar në Irak për të ndihmuar në stërvitjen e ushtrisë kombëtare. Presidenti Obama ka autorizuar gjithashtu dërgimin e 1.500 të tjerëve për të mbështetur trupat vendase.

Rafineria e naftës pranë qytetit Baixhi, rreth 200 kilometra në veri të Bagdadit, prodhon thuajse çerekun e naftës irakene.

Guvernatori i një province lokale deklaroi se forcat e rregullta ndodhen në hyrjen e rafinerisë, ndërsa një televizion bëri të ditur se ato tashmë kanë hyrë brenda perimetrit.

Dëbimi i tërësishëm i militantëve të ISIS nga qyteti Baixhi dhe rafineria do t’u jepte forcave irakene mundësinë e ndërprerjes së të gjitha kanaleve të furnizimit për ekstremistët.

Top Channel