Putin: SHBA nuk do ta nënshtrojnë kurrë Rusinë

“Ata nuk duan të na turpërojnë, por të na nënshtrojnë. Ata duan të zgjidhin problemet e tyre në kurrizin tonë”, tha Putin në fund të një takimi prej 4 orësh me një grup mbështetësish të Frontit Popullor.

“Askush në histori nuk ia ka dalë këtij synimi me Rusinë dhe askush nuk do ta realizojë”, tha ai, duke fituar duartrokitjet e të pranishmëve.

Fjalimi i ashpër i Putinit reflekton përkeqësimin e marrëdhënieve mes Moskës dhe Uashingtonit, të cilët janë në përplasje të ashpër prej krizës së Ukrainës, teksa Perëndimi akuzon Rusinë për dërgimin e armatimeve dhe trupave ushtarakë në mbështetje të rebelimit të separatistëve.

Gjatë takimit, Putin nxiste vazhdimisht firmat ruse, përfshi ato në agrikulturë dhe në sektorët e Mbrojtjes, të rrisnin shitjet e tyre në tregjet vendase pas sanksioneve të vendosura nga Perëndimi mbi situatën në Ukrainë.

Putin ngriti një sërë pyetjesh gjatë eventit, mbi gjithçka. Nga shitjet e matësve të glukozës në gjak e deri te problemet e strehimit, ndërkohë që lideri rus theksoi edhe njëherë vendosmërinë për të përmirësuar ekonominë e vendit të tij, që po vuan nën ndikimin e sanksioneve.

Top Channel