KiE ndihmë Ballkanit për mbrojtjen e minoriteteve

Qëllimi i zbatimit të këtij projekti është që pjesëtarët e pakicave në këto vende t’i gëzojnë të drejtat e tyre në mënyrë të barabartë me të gjithë qytetarët.

“Një ndërhyrje e tillë që nuk është e vetme nuk shikohet si përgjigje për problemin por është një mënyrë deri diku inovatore eksperimentale ku Këshilli i Evropës në partneritet edhe me Komisionin Evropian përcjell një mesazh të fuqishëm që dy institucionet të rëndësishme bëhen bashkë  kur bëhet fjala për mbrojtjen e minoriteteve”, tha Juliana Hoxha, përfaqësuese e Kongresit të Këshillit të Europës.

Projekti i Këshillit të Evropës për avancimin e të drejtave të njeriut dhe mbrojtjen e pakicave nga diskriminimi u promovua të mërkurën në Shkup. Ministri i Pushtetit Lokal në Maqedoni, Lirim Shabani pret që ky projekt, të përmirësojë lidhjet ndërmjet njerëzve, të ngrit nivelin e komunikimit dhe të ndërtojë ura ndërmjet pjesmatarëve të bashkësive të ndryshme etnike.

“Maqedonia, si nënshkruese e Konventave ndërkombëtare për të drejtat e njeriut, qëndron fort në parimet e saja se vetëm barabarësia mes njerëzve mund të sjellë lumturi te qytetarët, të sjellë respekt të ndërsjellë dhe përparim të kualitetit jetësorë”, tha Shabani.
 
Zbatimi i këtij projekti pritet që ti nxitë autoritetet lokale që të implementojnë në komunat e tyre normat dhe standardet evropiane për të drejtat e njeriut.

Top Channel