Akseleratori për sëmundjet tumorale

Në Qendrën Spitalore Universitare Tiranë, pranë Shërbimit të Neurokirurgjisë ku është instaluar akseleratori linear, kryhen çdo ditë 24 radioterapi dhe 1 radiokirurgji për pacientët që vuajnë nga këto sëmundje.

“Ne kemi filluar me atë që quhet radiokirurgji, që ka të bëjë me trajtimin e sëmundjeve kirurgjikale dhe brenda ditës sëmundja është e shëruar. Së fundmi kemi filluar edhe me atë që quhet radioterapi. Ky është një aparat i aftë të kryejë radioterapi dhe radiokirurgji në çdo pjesë të trurit me saktësinë e milimetrit, ndërkohë kemi edhe radioterapinë e çdo pjese tjetër të trupit. Jemi duke marrë rezultatet e para dhe janë shumë premtuese”, tha Dr. Shk. Artur Xhumari , neurokirurg.

Një pacient me sëmundje tumorale mund të ketë nevojë për kirurgji, kimioterapi, radioterapi apo radiokirurgji, ku tumori bombardohet me anë të rrezeve, por për këto vendos një ekip i specializuar mjekësh.

Radiokirurgjia nuk ofrohet as në klinikat jopublike në vend dhe as në vende fqinje si Maqedonia dhe Mali i Zi. Drejtorja e QSUT-së Ogerta Manastirliu thotë se për shkak të nevojave të shumta në QSUT do të instalohet edhe një akselerator i dytë.

“Për herë të parë në QSUT ofrohet shërbimi i radiokirurgjisë, si një shërbim totalisht i ri. Planet e QSUT janë që të shtrihet shërbimi i radioterapisë nëpërmjet pajisjes së akseleratorit linear jo vetëm në shërbimin e neurokirurgjisë, por edhe në shërbimin e onkologjisë dhe jemi në fazën e përfundimit të procedurave për ndërtimin e dy bunkerëve për vendosjen e këtij akseleratori, i cili do të rrisë dhe përmirësojë më tej shërbimin ndaj pacientëve me sëmundje tumorale”, u shpreh Ogerta Manastirliu, drejtoreshë e Qendrës Spitalore Universitare.

Sipas drejtoreshës Manastirliu, brenda vitit 2015, në Shërbimin Onkologjik do të jetë gati akseleratori i dytë që do të vendoset në Shërbimin Onkologjik.

Top Channel