Mustafa: Në 8 dhjetor, votohem si Kryeministër

Ai ka deklaruar se marrëveshja mes PDK-së dhe LDK-së do të finalizohet në ditët në vijim.
 
“Pritet finalizimi i marrëveshjes me PDK-në për ndarjen e përgjegjësive për të bashkëqeverisur në mandatin e ardhshëm. Në asnjë mënyrë nuk do të pranojnë koalicion me askënd nëse posti i Kryeministrit nuk i takon LDK-së, ashtu siç ka vendosur edhe Këshilli i Përgjithshëm i LDK-së. Sot ose nesër pritet përfundimi i harmonizimeve të programeve qeverisëse”, tha Mustafa.

Teksa lideri i LDK-së foli për realizimin e marrëveshjes, në ambientet e Kuvendit është mbajtur takimi i Grupeve punuese për hartimin e programit qeverisës të koalicionit PDK-LDK.

Pavarësisht deklaratave që janë bërë deri tani, ende zyrtarisht nuk ka një  ndarje të  ministrive të caktuara dhe as caktim të udhëheqësve të dikastereve.

Teksa lideri i LDK-së Isa Mustaf foli para Kuvendit për marrëveshjen me Thaçin, ky i fundit  ishte në një takim me agjentët e Agjencisë Kosovare të Inteligjencës.

Në cilësinë e kryeministrit, Thaçi ka njoftuar në Facebook se ka takuar strukturat e AKI-së.  

Thaçi u ka thënë agjentëve se askush më mirë se ta nuk e di se sa është e vështirë të ruhet liria dhe pavarësia e shtetit.

Kryeministri në detyrë, Thaçi ende nuk ka folur asnjëherë nëse do t’ia dorëzojë detyrën e kryeministrit partnerit të ri të koalicionit, Isa Mustafa.

Thaçi në martën pritet të udhëtojë drejt Shteteve të Bashkuara për të marrë pjesë më 4 dhjetor në mbledhjen e Këshillit të Sigurimit për Kosovën.

Top Channel