Lufta kundër krimit, Tahiri në Romë

Takimi i sotëm i dy ministrave vjen pas atij të zhvilluar në muajin qershor të këtij viti, pak përpara nisjes së operacionit kombëtar antikanabis, ku u asgjesuan mbi 500 mijë rrënjë bimë narkotike dhe mbi 100 ton hashash.

Ministri Tahiri e informoi homologun italian në mënyrë të detajuar për rezultatet e operacionit dhe gjeti rastin për ta falënderuar në mënyrë të drejtpërdrejtë për ndihmën e rëndësishme që dha shteti italian në këtë operacion, nëpërmjet mbështetjes me avionët e “Guardia di Finanza”.

“Mbi 7 miliardë euro ishte vlera e drogës që u shkatërrua këtë vit nga Policia shqiptare dhe që, nëse nuk do të ishte kapur, do të përfundonte në rrugët dhe shkollat e Italisë”, u shpreh ministri Tahiri.

Ministri Tahiri e informoi ministrin Alfano edhe për angazhimin serioz të Shqipërisë në luftën kundër terrorizmit. Ai ka theksuar se tashmë, në Policinë e Shtetit është krijuar një Drejtori me rreth 100 specialistë, që do të merren me çështjet e luftës kundër terrorizmit, ndërsa më parë me këto çështje merrej një sektor me 8 punonjës.

Ministri shqiptar theksoi se është e domosdoshme që të gjitha vendet e Ballkanit të kënë një axhendë të përbashkët në luftën antiterror. “Është e nevojshme një qasje rajonale dhe europiane e të gjitha vendeve që pqrballen, si me qytetarët që shkojnë për të luftuar në Siri dhe vendet e tjera të atij rajoni, tha Tahiri.

Ministri Alfano përgëzoi homologun shqiptar dhe tha se ndihej shumë i impresionuar nga rezultatet në luftën kundër drogës, që arriti Policia shqiptare. Ai u shpreh për një ndihmë të pakursyer të Italisë ndaj Shqipërisë dhe bashkëpunimi ka për të qenë më i ngushtë, në kushtet kur vendi ynë tashmë ka fituar edhe statusin kandidat për në BE.

Ministri Tahiri tha se Italia mbetet partner strategjik.

Top Channel