Minstri i Brendshëm shqiptar, Saimir Tahiri është takuar të mërkurën në Londër me drejtuesit më të lartë të Antiterrorit Britanik, si dhe drejtorin e përgjithshëm të Agjencisë Kombëtare të Antikrimit, që njihet ndryshe si FBI-ja britanike.
Duke folur për Top-Channel, zoti Tahiri tha se gjatë takimit me drejtorin e Politikave dhe Strategjive të Antiterrorit në Home Office, Jonathan Emmet, u diskutua për rritjen e nivelit të bashkëpunimit kundër terrorizmit, përmes shkëmbimit të informacionit mes palëve.
Gjatë takimit është folur edhe për ndihmën që Ministria e Brendshme britanike mund t’i japë Drejtorisë së re të Antiterrorit që është ngritur së fundmi në Shqipëri, e cila tashmë ka gati 100 oficerë që do hetojnë terrorizmin.
Asistenca britanike mësohet se do të jetë në formën e informacioneve dhe në ngritjen e kapaciteteve përmes trajnimeve të agjentëve.
Ndërsa në takimin me Keith Bristow, drejtor i Agjencisë Kombëtare të Antikrimit, u vlerësua bashkëpunimi i shkëlqyer ndërmjet NCA-së dhe Policisë Shqiptare, si dhe rezultatet e arritura në luftën kundër krimit të organizuar, veçanërisht kundër trafikut të drogës dhe korrupsionit.
Ministri Tahiri deklaroi se zoti Bristow u shpreh i gatshëm që NCA të ndihmojë Ministrinë e Brendshme shqiptare në fazat e para të ngritjes së Byrosë Kombëtare të Hetimit, përmes ngritjes së kapaciteteve, informacionit, infrastrukturës dhe teknologjisë.
Një oficer i NCS-së do të qëndrojë në Shqipëri për të asistuar të gjithë procesin e formimit të Byrosë Kombëtare të Hetimit, si dhe për të lehtësuar bashkëpunimin e ngushtë ndërmjet dy agjencive.
Bashkëpunimi i Shqipërisë dhe Britanisë së Madhe mbetet shembullor në fushën e sigurisë dhe në luftën kundër krimit të organizuar. Grupet kriminale shqiptare, sidomos ato të drogës kanë qenë në vitet e fundit dhe vazhdojnë të jenë mjaft aktive në Britani.
Disa dhjetra grupe të tilla janë asgjesuar gjatë 2014-s nga organizmat ligjzbatuese britanike dhe drejtësia e Mbretërisë së Bashkuar, e cila ka dhënë dënime të gjata për eksponentët e tyre.
Të enjten ministri Tahiri do të takohet edhe me homologen e tij britanike Teresa May.
Top Channel