Bushati: Kosova të bëhet anëtare e OSBE

Anëtarësimi me të drejta të plota në Organizatën për Siguri dhe Bashkëpunim në Europë është kërkuar në ministerialin e mbajtur në Bazel të Zvicrës, nga ministri ynë i Jashtëm Ditmir Bushati, në prag të marrjes së presidencës së radhës nga Serbia, që deri tani ka refuzuar anëtarësimin e Kosovës.

Kërkesa për anëtarësimin e Kosovës nga ministri Bushati është bërë paralelisht me kërkesën për një rol të rritur të OSBE-së, në monitorimin dhe nxitjen e respektimit të të drejtave të shqiptarëve në rajon.

Megjithatë, Shqipëria dha mbështetjen për presidencën serbe, por me parakushtin që politika e Jashtme e Beogradit të njehsohet me atë të Bashkimit Europian, për të garantuar kryesim të drejtë dhe të balancuar të presidencës së OSBE nga ky shtet.

“Gjithashtu kam kërkuar me forcë afrimin e Kosovës me OSBE-në, pjesëmarrjen e saj me formate të ndryshme të kësaj organizate, me frymën e marrëveshjes së Brukselit ndërmjet Serbisë dhe Kosovës, në frymën e angazhimeve të Kosovës dhe anëtarësimeve të tjera në nisma rajonale, europiane dhe ndërkombëtare, me qëllimin përfundimtar: anëtarësimin e plotë të Kosovës në OSBE”, u shpreh ministri i Jashtëm Bushati.

Ministeriali i OSBE, që ka mbledhur krerët më të lartë të diplomacisë së vendeve anëtare, përgjatë dy ditëve pati në fokus çështjet e sigurisë europiane dhe më gjerë, pas kërcënimeve të reja, veçanërisht pas krizës ukrainase.

Gjatë këtij ministeriali, ministri i Jashtëm zhvilloi takime dypalëshe me ministrin e Jashtëm turk, që deklaroi se do të vijë në Tiranë në fillim të 2015-s; me homologun izraelit, me të cilin Bushati foli për mundësitë e reja të zgjerimit të kapitalit izraelit në Shqipëri; ndërsa me homologun e Azerbajxhanit për perspektivën e re që hapet me realizimin e projektit TAP.

Top Channel