PD: Mashtrim me paketat për shëndetësinë
13/12/2014 00:00
“Meta dhe Kryemadhi mund të arrestohen në çdo çast”, Artan Hoxha: SPAK ka tentuar disa herë për ta bërë bashkëpunëtor… 26/04 20:35
Partia Demokratike thotë se paketa e mjekimit në spitalet private nuk është një risi, siç po përpiqet ta shesë publikisht qeveria.
Tritan Shehu, shef i departamentit të shëndetësisë pranë PD, listoi se tre shërbime, kryesisht për veshkat, kanë ekzistuar që në kohën e Partisë Demokratike.
“Qeveria e majtë deklaron për 6 paketa, 3 prej të cilave funksionojnë prej kohësh në vendin tonë, mirë dhe me sukses”, deklaroi Shehu.
Sipas PD, megjithëse paketa është shtuar, prej saj përfitojnë pak të sëmurë dhe ç’është më e rëndësishme, ajo ka probleme serioze dhe nuk eliminon pagesën për privatët, siç pretendon qeveria.
“Për çdo patologji përfiton një numër shumë i kufizuar të sëmurësh. Vlera e pagesave është llogaritur në mënyrë të përgjithshme. Nuk llogariten vlerat e qëndrimit para dhe pas operacionit, por vetëm dy ditët e terapisë intensive, që janë krejt të pamjaftueshme”, theksoi Shehu.
Partia Demokratike i bëri thirrje qeverisë që të pranojë atë që e quan ‘mashtrim për shëndetësi falas’, i provuar së fundmi edhe nga paketa e bashkëpunimit me spitalet private.
“Financimet për realizimin e këtyre paketave nuk vijnë nga qielli, por vijnë nga kontributet e qytetarëve, ose nga taksimi i përgjithshëm. Pra, dalin nga xhepat e qytetarëve, sepse asgjë nuk ka falas dhe aq më tepër shëndetësia nuk mund të jetë e tillë”, shtoi Shehu.
Top Channel
