Afganistan, masakër në prag të largimit të NATO-s

Megjithatë, edhe vetë guerrilasit kanë pësuar humbje të konsiderueshme nga reagimi i trupave ushtarake, përfshirë ato ndërkombëtare.

Masakra, që shënon një intensifikim të dhunës, ka ndodhur në prag të tërheqjes së trupave ndërkombëtare që parashikohet të bëhet në dy javët e ardhshme.

Në Kabul gjatë së shtunës një bombë shpërthey gjatë kalimit të një autobusi që transportonte ushtarë, duke vrarë 7 prej tyre.

“Ishte një atentator vetëvrasës që eci drejt autobusit në këmbë dhe shpërtheu eksplozivin tek dera e mjetit”, deklaroi një zëdhënës i policisë së Kabulit.

Më herët, një person i armatosur kishte qëlluar për vdekje një zyrtar të Gjykatës së Lartë, Atiqullah Raoufi, teksa ky i fundit dilte nga shtëpia e tij, po në Kabul.

Talebanët, të rrëzuar nga pushteti nga forcat afgane të mbështetura nga SHBA në vitin 2001, morën përgjegjësinë e këtij krimi, por nuk argumentuan motivet e vrasjes.

Krahu ekstrem i rebelëve ka gjykatat e tij në disa zona të vendit dhe e konsideron sistemin gjyqësor zyrtar si të korruptuar.

Sakaq, dy ushtarë të NATO-s humbën jetën nga një sulm i rebelëve në afërsi të bazës kryesore ndërkombëtare në veri të kryeqytetit.

Viktimat dhe lëndimet në radhët e forcave afgane të sigurisë dhe civilëve arritën këtë vit në nivelin më të lartë që kur SHBA nisën luftën në vitin 2001, e ndërsa trupat e huaja u tërhoqën nga zonat malore të vendit.

Top Channel