Pengmarrja në Australi, identifikohet agresori: Man Haron Monis

Ai njihet gjithashtu si Sheikh Haron, një i vetëquajtur klerik musliman, i cili ka pranuar fajësinë gjatë vitit të kaluar se u kishte shkruar letra kërcënuese familjeve të anëtarëve të shërbimit australian, njoftojnë më tej mediat australiane. Për këtë akuzë, ai u dënua me 300 orë shërbim ndaj komunitetit.

Në vitin 2013, ai është akuzuar gjithashtu se ka qenë përfshirë në vrasjen e ish-gruas së tij, sipas lajmeve nga Australia, të cilat shtojnë se ai është liruar me kusht. Në prill të këtij viti, detektivë të krimeve seksuale kanë arrestuar Monis dhe e akuzuan atë për agresion seksual ndaj një gruaje, në rajonin perëndimor të Sidnejt gjatë vitit 2002, sipas “Sydney Morning Herald”.

Një tjetër akuzë me natyrë seksuale i është shtuar atij në lidhje me 6 viktima të tjerë të këtyre akteve. Policia – siç raportohet – ka thënë se Monis ka përdorur emrin Mohammad Hassan Manteghi, si dhe pretendonte të ishte një “shëronjës seksual”.

Në atë që dyshohet të jetë faqja e internetit e tij, ka një deklaratë ku ai pretendon se ka qenë viktimë e një hakmarrjeje politike.

Në biografinë e shkurtër në faqen e tij, ai vetëpërshkruhet si një klerik musliman dhe aktivist që jeton në Sidnej, i cili “ka qenë vazhdimisht pre e sulmeve dhe akuzave false nga qeveria australiane, si dhe media e këtij vendi, që kur ai nisi fushatën politike në vitin 2007”.

Në krye të faqes së tij ndodhet një foto grafike e fëmijëve të vrarë e poshtë saj shkruhet “kjo është një provë e terrorizmit të Amerikës dhe aleatëve të saj, përfshi Australinë. Rezultat i sulmeve ajrore të tyre”.

Top Channel